هو انت حيفضل منك ايه ؟
Submitted by malek on Sat, 2007-03-31 00:18.
هو انت حيفضل منك ايه ؟
هو انت حيفضل منك ايه ؟
مش من الدود وللدود تعود بغض النظر ان كنت طير في السما ولا على الأرض هلفوت ؟؟؟؟
أعتقد اني كتبت أكتر من تدوينه بتدور عن نفس المعنى ...ايه اللي حيفضل مننا ..ومن غير كلام كبير عن الدور النضالي والسياسي ولا حتى الدعوة والجهاد والذكر الحسن وكل الخرا اللي بنضحك بيه على بعض شمال ويمين ملاحدة ومؤمنين .
الحقيقه اللي حيفضل منك على الأرض بعد عشرة ولا عشرين سنه ؟
حد حيفتكرك ويقول دا جدع ؟ ولا حد حيفتكرك ويقول دا كان ابن وسخه ؟
ايه اللي حيفضل منك ؟ شوية عيال حتلعنك ولا تشكرك ؟ حتكون عملت ايه ؟ هو فين الهدف ؟ هي فين النتيجه ؟
لما بشوف ناس زي مهدي عاكف ولا اي حد في سنه من الناحية التانيه أدور على النتيجه اللي عملوها
ألاقيها صفر كبير أوي
غير أنهم بنوا تنظيمات وهدوا تنظيمات الخ الخ بس ايه نتيجتكم في بلد زي دي ؟ لبسوا كام حرمه حجاب وقلعوا كام حرمه حجاب في النهاية ايه نتيجتكم في بلد زي دي ؟؟؟؟
من شهرين كنت مع صديقه بتكلمني عن ناشط عمل فيلم دلؤتي عن غزه ونساء فلسطين او حاجه من هذا القبيل بتقولي ان الناشط دا كان علم في التسعينات وكان لما بيعتقل نبيل الهلالي شخصيا"واللي ميعرفش الهلالي دا أنضف شخص عاش خلال ال80 سنه اللي فاتوا" بينزل يدافع عنه .
النهاردة صديقه اخرى بتذكر نفس الشخص محدش من اللي قاعدين اللي هما كلهم من جيلي إفتكروا الناشط دا ومسمعوش عنه أصلا :)
هو ايه الأسوء أنك تتنسى بعد ما تموت ولا تتنسى وأنت عايش؟؟؟؟
يعني المهم في النتيجه هو ايه الفائده من كوننا عايشين او ميتين؟ أعتقد السؤال السابق أحمق ومبتذل جدا وله ألف رد ورد بس بجد احنا بنستلم كل يوم رايه وسخه من جيل استلمها وسخه كل الأجيال بتسلم الرايه أوسخ للي بعدها والمفترض ان الجيل الأجدد يحاول يكمل بالرايه....طب بأمارة إيه ؟
هو العيب على مين ؟ على أبائنا اللي رضوا بالظلم ؟ ولا أجدادنا اللي رضوا بجزء من الظلم ؟
واحنا المفترض اننا نغير كل الظلم دا ؟ ودماغ أغلب جيلنا خلاص بأت عبارة عن سلة متناقضات عجيبه مليانه عجز وعدم حيله متعرفش توصل ﻷخرها؟
كنت من فتره مع صديق كنا في مقابله صحفيه الصديق بيتسئل هو نشأ ازاي واتربى ازاي ودا كان له دخل ولا ﻷ في إتجاهه الفكري الخ ...
طبعا انا عارف مين أسرة الصديق واد ايه قدرت انها تعمل بني أدم بيفهم ....انما اللي مش فاهمه احنا ليه أسرنا كلها مكنتش كدا ؟ ليه كل أبائنا وأمهاتنا إتربوا وربونا على الخنوع والخضوع والجبن والخوف ؟ ليه بقوا كدا ؟ ووصلوا لينا إحساس العجز المميت اللي بنقابله في كل مكان وفي كل وقت ؟
ليه الخوف المرضي من كلمة لأ عاليه ؟ ليه الخوف من إنك تعترض؟ ليه الإهتمام المبالغ فيه بالمظاهر والإستهلاك ؟ ليه المظهرية الدينيه ؟ والإجتماعيه ؟
ليه فرضوا على جيل كامل انه يموت عاجز ؟؟؟؟؟؟؟؟؟
وليه الناس بترضى بالموت عجزا ؟
ممكن النهارده بكل غباء اليوم والسيرك النضالي بتاع الثوريين والأخوان والكرامه كان في لحظه حلوه لما عم نجم إتكلم عن عم أحمد منيب .
أعتقد اني عايز يفضل مني حد يقول عليا كان جدع ومكنش جبان ومحدش يكرهني حتى لو ندلت معاه ,أعتقد عايز يبقى مني حد يقول اني على رغم من كل حاجه عملتها كنت أهبل وعلى الرغم من كل عيوبي مكنتش لا واطي ولا جبان ,وان عمري ماكنت ندل وان ندلت مع حد فأكيد أنا أسف عليها
....
وإذا هيدي هيي الحريه الله يسعدها
يسعدها ويبعدها
زياد رحباني
1717 reads
hakza he bladna al7byba
hakza he bladna al7byba tsir fiha alrayh mn aws7" eli aws7" aswa2 she enk tkon 3arf dah b3d ma 2ryt klamk bakit belf3l 3ly nafsy w 3ly baldy e7na lyh kda lih ma2sah ba7bk yamalk lank rag3tny tany a7s zy zman
كلنا
أعتقد ان كل واحد بتجيلوا التساؤلات دي
عايشين ليه؟و بنعمل ايه؟لينا قيمو؟فيه فايدة؟هل حياتي زي موتي؟
أنا بحب أوي قصيدة لبريخت نشرتها على البلوء (بالعربي يا عم الحج) بتديني أمل على قد ما تحبطني و مش عايزة اتعامق عليك بس بجد يا مالك وجود اشخاص زيك و زي كتار غيرك هو اللي بيقوي الواحد, على الأقل أنا مش بحس أني لوحدي
:)
the only thing that will
the only thing that will remain is ur efforts 2 change the human mind ..
هو انا ليه مش
هو انا ليه مش عارفة اسمع ام الازاعة بتاعتك
بتقطع
ما تقوليش داونلود
مش بيداون لود
وبيهنج الجهاز
ايه بقى؟
التوقيع
عبقرية الكمبيوتر
من غير زعل
المخلص اللي مش بتاع تساوير
ح يتنسي
وبتاع التساوير او حتى اللي اتصور غصب عنه
في الاخر كله ح يتساوى
والنضيف اللي البلد دي ح تفتكره ح تسمي باسمه شارع موازي لشارع تاني متسمي باسم اوسخ بني ادم في نفس المرحلة
زي ما طومان باي مواز لسليم الاول
وزي ما عندنا شارع مصطفى النحاس وشارع مكرم عبيد وشارع سعد زغلول وشارع مصطفى كامل وشارع محمد فريد
لو شاطر تعرف النضيف من الوسخ فيهم
هههههههههه
انا عارفة انك ح تعرف
اكتم بقى في قلبك
عشان ما تهدمش "رموز مصر"
صباح الفل
انما
والنبي كان يوم حلو
صح؟
بس المرة الجاية بقى مش كوسة
احسن ده كان مقلب
lol
ولا حاجة .. هي دي الاجابة
طب انت في الاخر بتقول عاوز يفتكرك انك مكنتش ندل او كنت شجاع او محدش زعل منك او او
بس طب و بعدين افرض عملت كل ده ؟؟
هتنبسط و انت مش موجود ؟؟
تعرف
انت خلتني افكر في معنى اهم كلمة في الوجود و لو اننا مبنحبش نفتكرها كتير
النهاية
و النهاية = صفر
مهما كان الموجود كبير او صغير , مشهور او مجهول ,قوي ولا ضعيف ,مؤثر ولا تافه
كله بيحصلو حاجة واحدة مهما كان
بينتهي
و النهاية = صفر
مفيش نهاية بتساوي اكتر من صفر حتى نهاية يوليوس قيصر في الاخر = صفر
الشاطر بأى الي عرف ان كل ثانية بيعشها ممكن تبقى هيا النهاية العبثية عشان كده ميضيعهاش
و زي ما النهاية = صفر
الحياة لازم تساوي مليون و مليار
سيبك
أنا في حاجة مش
أنا في حاجة مش فاهمها.. هو معني الحياة الوحيد في أننا نقول لأ؟ أو في التغيير السياسي؟ هل دي الحاجة الوحيدة اللي لها معني و يدور الجدل حول هيفضل منها إيه؟
السؤال, لو حصل كل ما يحلم به الواحد من تغيير و بقت الناس كلها قادرة تقول لأ و الجو ده... هتعمل إيه وهتهتم بإيه ه و هتعيش ليه؟
لو عارف إجابة الأسئلة دي منصحكش تستني حاجة علشان تعمل الكلام ده و يا ريت تبقي تحكيلي.
حكاية الفرد اللي عايش ناشط دي الصراحة مسنحيل تعمل ناس سوية و دوافعها نقية, عند مرلة بتبقي زيها زي كل حاجة تانية, طريقة الناس تحقق ذاتها بيها بصرف النظر عن فائدتها.
معلش استحملني
مش عارف هتقبل مني الكلام ولا هتعتبرني شايف نفسي قديس و بتعالى و بتمنظر عليك...بس على العموم انا هقول و خلاص و ربنا يعلم ان نيتي سليمة....
انا شايف ان الذكرى اللي البني ادم بيسيبها بعد ما يموت و الحاجات دي ،ده كله كلام فاضي ولا هيودي ولا هيجيب..
المهم هو الواحد هيخش الجنة ولا هيخش النار
مش مهم يكون ليا انجازات عظيمة في حياتي(قصدي انها في حد ذاتها مش هدف) يعني هستفيد ايه لما الناس كلها تشكر فيا و تفتكرني بالخير و انا (بعد الشر) اكون في النار. و بردو العكس ، يعني ممكن واحد ولا اي حد يسمع عنه ولا يفتكر سيرته بس هو عند ربنا في الفردوس الاعلى ،اكيد ساعتها مش هتفرق معاه.
و شكرا لسعة صدر سيادتكم
لا مش قصدي
لا مش قصدي الذكرى والكلام دا اعتقد اني وضحت في اول سطر موضوع الدود الخ
انا قصدي انت غيرت اد ايه في دنيتك ؟
دا اللي انا عايز اعمله انا غيرت فعلا ولا انا عملت حاجه مفيده ولا لا انا قدرت اني ابقى حر واخلي غيري حر ولا لأ؟
الأهم من دا كله هل انا حقيقي ؟ ولا كداب ؟
مش قدام نفسي قدام الناس لأن قدام نفسي كل انسان متأكد انه حقيقي الأهم الناس بتحكم عليك ازاي ؟
فاهمني ؟
موضوع الجنه والنار أكيد دا موضوع مهم والأهم إلخ بس في النهاية دي مش حاجه راجعه لتقدير أي حد غير ربنا لا أنت ولا غيرك يعرفها وبلاش كلام عن معطيات ونتائج عشان كل دا بيتغير في طرفة عين :)
"ياريت السطر السابق مياخدش أكبر من حجمه لأنه مش الموضوع اللي مكتوب عشانه التدوينه ولو حد شايف اني غلطان فأنا بعتذر له وبنهي الموضوع "
طيب هو ايه
طيب هو ايه الطريق اللي المفروض نمشي فيه علشان نغير الحاجات الوحشة في البلد علشان لما نيجي نسلم الراية نبقى على الاقل قطعنا شوط
مش معقول ناخد الراية و نقف بيها في مكاننا ، ولا نطلع نجري يمين و شمال في اي اتجاه (بغير هدى)مش عارفين ايه هيوصلنا فين
...ياريت كده اكون فهمتك صح
نسيت اقول ان
نسيت اقول ان فاطمة عندها حق
انت تعبان
لازم تكون متاكد
لازم تكون متاكد انه هيفضل حد بيقول عليك... على الاقل ياسيدى لومش اصحابك ورشا واهلك هيكون ناس زيى وزى فاطمة اللى كتبه فوق وغيرنا.الناس اللى ما بيعرفوش يكتبوا ولا يقولوا فبيدخلوه عند مالك عشان يلاقوا نفسهم وكمان عشان يفهموا
انت اصلك شكلك كده مش عارف : اقولك يا سيدى
احنا بنقول كلام عنك جايز تكون متعرفوش بس الاكيد انه اجمل بكتيييير مما تتخيل
يمكن جماله اكتر فى انك مش عارفة
ومش سامعه بس لازم تكون عارف على الاقل انه بيتقال
بنقول غير فينا، بنقلق عليك لما بتتمسك، بنجرى على علاء عشان نعرف اخر الاخبار مالك فين، بنزعل عشان رشا ويتحرق دمنا لانها حبيبتك مينفعش تتاذى، حاجات كده كتيير انت ماتعرفهاش
ومش بنقولها لانك مش مهم تعرفها المهم اننا بنحسها
كفاية انك قاعد فى بيتك دلوقتى بتقرا كلامى ولاعمرك ولاعمرى هاشوفك
و بقولك ان مالك غير فيه حاجات - ولو قلت حاجة واحدة طبعا ابقى بكدب -مش مجاملة طبعا انت متعرفنيش ولا اعرفك بس لو ما قولتش كده ابقى مش استاهل اللى مالك غيره فيى
اكيد هيفضل يامالك اكيد
ربنا يكرمك على
ربنا يكرمك على الكلام الكبير اللي مش قده
ومش دا قصدي بالظبط ,انا قصدي فيما بعد بعد 10 او 20 سنه
بعد الموت بعد كل حاجه ايه اللي حيفضل ؟؟؟؟
حسلم الرايه لغيري عامله ازاي؟
لما يبقى عندي حاجه و30 سنه ويجيلي شاب 16 سنه حديله رايتي ازاي عشان يكمل ؟ وهل حيكمل فعلا ولا حيلاقي ان جيلنا معملش حاجه ؟
ولا حيقولي اللي بقوله لجيل أبويا والأجيال اللي بعده اللي سكتت ورضت
وباعت وخضعت وخنعت وقبلت بالهوان والمهانه والذل
حسلم الرايه ازاي ؟؟؟؟؟ وبعد ما حسلمها ؟؟؟!!!!!!
"طبعا مش كل المنتمين للأجيال السابقه خانوا...بس الأغلبية خانوا واللي فضل أقلية"
مش ده اللى انا
مش ده اللى انا فهمته من كلامك فى البوست بصراحة بس انا متهيالى اننا ماينفعش نلوم على الاجيال السابقة للدرجة دى لاننا وقعنا فى نفس الوضع ولسه بنعافر فيه ومش عارفين اخر الطريق فين ولا هنتعب امتى؟
طبعا عليهم لوم كبير بس صدقنى ساعة الاستفتاء والناس اللى فى سنى - 21 سنة- فى الكلية لما كانت بتضحك على كلامى وانا بقول نروح نقول لا، حسسنى ان الاجيال بتكرر نفسها،ما احنا فى نفس الوضع واسوء من اللى فاتوا ولسه نسبة كبيرة من المتديين قضيتهم فى الحياة مازالت عند تقصير البنطال للرجال والاسبال والنقاب والموسيقى ؟!!!
المثقفين: اعداد ماهولة منهم قلقين جدا!! على مستقبل مصر من انتشار الحجاب والافلام الشبابية ؟!!!
مش بعمم طبعا يا مالك ، مش عارفة انت فاهم قصدى ولا لا
مازلنا مش عارفين نلاقى بعض رغم ان الظروف اصعب من زمان
يعنى... انا قصدى نعمل اللى علينا من غير حكم نهائى على الاحداث والتغيرات، اكيد محبط ان التغير مش ملموس على قد اللى بيتعمل ،بس ده هيبقى فوق طاقتنا اوى
انا بس عايزة اقولك حاجة واسفة على التطويل فى رسايلى:
ناس كتيير اوى بتكون ناشطة ووطنية وعندهم ضمير بجد واتبهدلوا عشان البلد دى وبعد شوية وقت لما يجوا يسلموا الراية يخونوا ويعتبروا اللى عملوه زمان يشفع اى حاجة حتى لو كانت انهم يبيعوا متهيالى انك ممكن تكون قابلت من النوع ده ولا ايه؟
,
ده اللى انت ممكن تخاف على نفسك منه
لان ده بيكون مقياس ليك على كل اللى فات
ده اللى بيقول انت كنت ايه زمان، او على حد تعبيرك حاسلم الراية ازاى؟؟؟ وبعدما حاسلمها؟؟
أوي أوي
اوقات كتير كنت أقرا عندك حاجات و تعجبني بس المرة دي عجبتني اوي اوي
اول مرة تتكلم بالهدوء و السكينة دي
انت تعبان
طيب ححاول أتكلم
طيب ححاول أتكلم المرات اللي جايه بهدوء أكتر :)
Post new comment