رسالة من صديق كان فيها نوع من أنواع التهزيق المؤدب ليا ولكل مدون رامي شمال تاني
الرساله بإختصار بتحمل المعاني التالية
ان حلو اوي الدفاع عن الإخوان واننا لازم نوحد صفوفنا الخ بس أعتقد انه الأجمل اننا ندافع عن اللي لينا الأول
أو بالمعنى الشعبي اللي يحتاجه البيت يحرم ع الجامع
طلب مننا اننا على الأقل نذكر اللي بيحصل في دار الخدمات النقابية والعمالية وأخر التطورات للموضوع دا وندي للناس فكرة عن مدى القمع اللي بتتعرض له إحدى مؤسسات المجتمع المدني اللي هي من أوائل المدافعين والداعمين للحركات العمالية الأخيره .
ايه اللي حصل بأه في دار الخدمات النقابية ؟
الموضوع بدأ ان الأمن حس بخطر الدار خاصة بعد نجاح عمال غزل المحلة أواخر العام الماضي في إنتزاع حقوقهم وإنتشار الموضوع لعمال كفر الدوار وشبين الكوم مرورا وصولا في الفترة دي لعمال مطاحن جنوب القاهرة
قام الأفاضل ضباط أمن دولة مدينة قنا قفلوا فرع الدار في نجع حمادي المثير في الموضوع ان الراجل بتاع وزارة التضامن المسؤول في نجح حمادي طلب الناس اللي ماسكين الدار في نجح حمادي انهم يقابلوه في مكتب أمن الدوله هناك.
المهم إتقفل الفرع اللي هناك ونزلت بيانات والموضوع إتقلب لفرح وحصلت تهديدات بإغلاق فرع المحلة ..قام الناس بتوع الدار قالوا يا إخوانا مش حينفع يلا حالا بالا نعمل إعتصام في فرع الدار بالمحلة ..الإعتصام كان مقرر له يوم خميس الدار كانت مقفولة يوم أربع.
الناس ميأستش وقالت لازم نروح هناك وإتوجهت لها دعوه من الناس بتوع التجمع في المحلة عشان يدعموا الناس بتوع الدار ...طبعا المفروض الزيارة دي كانت للأخوه بتوع منظمات المجتمع المدني اللي إنسحب منهم جلهم ومتفضلش منهم غير عدد ميتجاوزش صوابع الإيد الواحده منهم طبعاد.عايدة سيف الدولة من مركز النديم,وعمنا صابر بركات من اللجنة التنسيقية للحقوق العمالية.
المهم الناس راحت المحلة وإتعمل مؤتمر هناك والموضوع كان الى حد ما مبشر"إثناء الزيارة كان في تشريفه أمنية محترمه متابعة الأتوبيس اللي في الناس من ساعة ما دخلوا المحله لحد ماخرجوا منها"
رجع الناس وعملوا وقفة في وزارة التضامن الإجتماعي مقر القصر العيني إتقابلوا مع وفد عشان توفيق الأوضاع الخ "الدار كان لها فترة طويله بتحاول تحصل على رخصه بس كان بيتقابل بتعنت من المسؤولين"
إنفضت الوقفه ..بس الكويس اننا قدرنا ناخد شوتات فيديو للحج شريف القماطي "إسمه القماطي مش الدماطي بناءا على معلومات من محامي كانوا في قضية أشرف إبراهيم المعروف بإسم تنظيم الإشتراكيين الثوريين واللي كان الحج شريف هو المسؤول عنها" وفيديو تاني للحج أبو سحله
بعد الوقفه السابقه دي بكام يوم حصل ان تهديدات جديده جات بغلق المقر الرئيسي للدار بحلوان .
راح الناس بتوع الدار تاني لامين الناس وقالوا حنعمل وقفة تانيه عند الوزاره في العجوزه عشان نقابل الوزير ونعرف اللي بيحصل.
الحقيقه ودي غريبه شوية ان الناس بتوع الوزارة إستقبلوا الناس بتوع الدار وممثلي منظمات المجتمع المدني بشكل كويس ووعدوا بتسريع الإجراءات وإن لا صحة للتهديدات دين الدنيا وردي .
مشى الوفد من هنا والمفترض ان الورق كان حيتقد بعدها بيومين وإنتهى الموضوع...فوجئ الناس بعدها بـ24 ساعة بقوات من الأمن المركزي وعلى رأسها مدير مكتب أمن دولة بحلوان ورئيس الحي بيطردوا الناس اللي معتصمه في المقر الرئيسي وبيقولوا معانا ورق بالإغلاق.
حصل في وقتها عدد من الإتصالات بأعضاء مجلس شعب مستقلين قدروا يوصلوا لوزير التضامن ,اللي كانت إجابته مذهلة"انا مأصدرتش قرار بالإغلاق وانا حديهم الرخصه بأسرع ما يكون ..ومشكلة الدار مش مع الوزارة مشكلة الدار مع الأمن"
تخيل يا محترم لما وزير يقول كدا ؟لما وزير بيتحكم فيه أمن الدوله ؟؟؟
"نفس التصريحات دي ذكرها تاني يوم الوزير في عدد من الصحف منها نهضة مصر "
المهم الناس بتوع الدار عملوا وقفه تاني يوم عند النائب لتقديم إحتجاج وفتح تحقيق ,النائب العام حولهم لمجكمة جنوب القاهرة بباب الخلق,هناك أصدر رئيس النيابة أوامره بإستدعاء رئيس حي حلوان وعدد من القيادات الأمنية هناك عشان الناس تعرف القرار دا صادر من مين ؟
الأزمه لسه شغاله والموضوع لسه منتهاش,
حسيبكم مع مجموعة من التغطيات المصورة للأحداث
"التغطيات التالية تم تصويرها لصالح موقع حركة شايفينكم"
1
إغلاق دار الخدمات بحلوان الجزء الأول

إغلاق دار الخدمات بحلوان الجزء الثاني

وقفة إحتجاجية بوزارة التضامن بالقصر العيني على إثر إغلاق فرع المحلة

جزء من تغطية مؤتمر دار الخدمات بالمحلة الكبرى