الأصل قبل الفرع
Submitted by malek on Tue, 2007-05-08 22:27.
المفترض ان في نت دلؤتي بس دي حاجه مؤقته كدا بس انا مش معترض
المفترض ان في نت دلؤتي بس دي حاجه مؤقته كدا بس انا مش معترض
عاش كفاح الطبقة العاملة
عمري ما تخيلت في حياتي اني اقول الشعار دا بس بجد حاسس الشعار دا أوي,الأيام اللي فاتت او عشان اكون أوضح خلال الشهرين اللي فاتوا قربت أوي لعمال المصانع والفلاحين نزلت كذا مكان وعملت كذا حاجه.
وبجد الحاجه الوحيده اللي بقيت أؤمن بيها ان لو جه تغيير حيجيي من هناك.
إنك تحس بالإنتماء
انا بني اّدم جدي كان لحام وكان عنده محل بوابير جاز ,والدي إشتغل مع أبوه وجده في الدكانة دي وفي المصنع ,والدي لولا عبد الناصر مكنش أخد إبتدائيه ولا حتى كلية الهندسة بتاعته.
عشان كدا لما بشتم عبد الناصر بحس ان في حاجه في صدري مبقدرش أهضم الشتيمة ممكن عشان أنا من الطبقة العريضة اللي إستفادت بشكل مباشر وبتورث الإستفادة دي لولادها.
عبدالناصر فعلا كان ديكتاتور بلطجي وكان قمعي ومريض ودي حاجه مبنكرهاش ,بس مبقدرش أكرهه للأسف .
ممكن عشان كدا بحس بإنتماء شديد وبحس ان في علاقه اكتر من علاقة دعم لما بنزل مصنع او موقع عمال,بحس اني إبن الطبقه دي بشكل او بأخر,بحس ان اللغه واحده"على الرغم من كون والدي ووالدتي تخلوا عن اللغه دي من زمان وبقوا يتكلموا ويتعايشوا وأدابهم ومعاملتهم طبقة وسطى زي الكتاب ما بيقول بس انا الزرع الشيطاني بتاعهم",بحس ان في أفكار متشابهه ,من أخد الحقوق بالإنتزاع مش بالتوسل ولا المظاهرات,من التهديد والتنفيذ في أحيان ياما بإحتلال المنشأه ,من فكرة متشابهه عن الرب والدين والحياة والبشر.
بحس اني أقل وعي ألف مره منهم بحس اني عيل فرفور وسط فتوات زمان,ناس بجد فاهمه مش بتتعولق لا مؤاخذه ,ناس عمرها ما طلعت برا البلد ولا بتفكر عمرها ما طلعت بازبورت ولا عرفوا الطياره الا في أحلامهم وهما رايحين يزوروا النبي"من الحاجات الغريبه في المصريين ميقولوش رايحين نحج يقولوا رايحين نزورو النبي:)ويقولك مصر إتخلصت من بقايا التشيع".
الأحلى في الموضوع في النهاية الفرح وشعور الإنتصار ونشوته اللي بحس بيها لما أي عامل ينتصر :) بحس ان الكئابة بتطير وان الدنيا حلوه بس إحنا نفهمها:).
النهاية
أغلب السياسيين والمثقفين المصريين بيتعولقوا "متضمن هنا من أقصى اليسار للإخوان "وتحس انك قاعد مع مره نتافه,يكلموك عن التغيير والحراك السياسي ,وتانيين يكلموك عن الإسلام هو الإصلاح وهو الحل.
عندي كلمه بسيطه لهم إن ربنا لما خلقكم كان غرضهم انه يكفر عن سيئاتنا بكم ويختبرنا .
الفرصه قدامنا إحنا اننا نشتغل مع العمال والفلاحين,مش حننزل نعتصم ولا نضرب معاهم لأن دا أكبر ضرر,بس الناس دي محتاجه دعمنا,محتاجه اننا ننزل وقت إعتصامهم نشد على إيديهم ونلم كام رغيف عيش على كام حتة جبنه ونقولهم لقمه هنية تكفي ميه ,نروح نصور اللي بيحصل معاهم ,نروح نقول لهم,إنتوا رجالة البلد دي ,ونسيبنا من رجالة ومنظرين الإصلاح والتغيير.
كلمة أخير
تموت القحبة و لسه بتطلب,ويامبارك طلبت ياما مش شايف انك تتوب بأه عن الطلب؟ ولا حتنزل بأغنية عمنا إمام "أنا أتوب عن طلبك أنا ؟ انا ليا في بعدك هنا ؟"
*الأصل في أغنية إمام ونجم أنا اتوب عن حبك أنا
2378 reads
دي اول مرة يا
دي اول مرة يا مالك اكتب تعليق في مدونة.. كل اللي جه على بالي بعد ما خلصت قراية "التدوينة" دي هو عبارة: جميل يا مالك.. جميل.
انا بجد شايف ان مصر يا بختها بولادها.. وعلى رأي الأغنية الكويتية "والدنيا ما تحلى إلا بحبايبها".. مصر يا مالك أنت واللي زيك اجمل ما فيها. تحياتي
الهدف هو النقابات
فيه اكيد حركة عمالية نشطة الفترة الأخيرة، بس هيبقى فعلا ظلم لو حملنا الحركات دى فوق طاقتها.
أكيد زى ما قال صحاب "ستظل قضايا العمال على طول تاريخهم هى الاجور والحوافز والبدلات وغيرها فيجب الا نتعالى على هذه المطالب "و فعلا لو حد متابع قوى الحركات دى، حيلاقى إن الهدف منها هو إصلاح النقابات العمالية اللى الدولة سيطرت عليها تماما و عكست عملها، من صوت للعمال ، إلى صوت الحكومة وسط العمال.
أنا اعتقد، إن اكتر النتايج إجابية من التحركات دى، هى الوصول لتمثيلات نقابية تعبر فعلا عن العمال.
فى الحالة دى، هيكون عندك قطاع كبير جدا من المجتمع ممثل بشكل جيد و ليه تأثيرة فى صنع القرارات. يعنى هيبقى عندك جماعة ضغط قوية و مؤثرة من الصعب إنك تتجاهل مطالبها ، و خصوصا إن الدولة زى ما هو واضح كدة إنها خايفة جدا من أى إضطربات فى القطاع ده
بعد الدراسة ..فتح نقاش حقيقى
اعتقد يا مالك ان كلامك مهم ممكن اختلف معاك فى فكرة عبد الناصر بس مقدر كونها شعور شخصى بس الفكرة ان بجد ترتيب الاوليات بيختلف فى تجربة زى دى التعامل مع امور حقيقة مختلف تمام عن الكلام و الجلسات اعتقد اننا نحتاج ليس فقط الشد من ازرهم لكن كمان لدراسة وضع العمال ومراقبة التغيرات اللى بتحصل وفتح نقاش حقيقى على التحركات العمالية الاخيرة بعد معاشرة التجارب الموجودة
ويا استاذ يسارى مصرى ستظل قضايا العمال على طول تاريخهم هى الاجور والحوافز والبدلات وغيرها فيجب الا نتعالى على هذه المطالب ..هذه هى المطالب الحقيقية التى تمس مصلحة العمال و التى يتجمعون للدفاع عنها واهمية العمال من الاساس تنبع من فكرة الدفاع عن مصالح والتنظيم لتحقيق نجاحات لهذه المصالح
اعيش مثلك فى حلوان منذ بداية ولادتى وكان لى الشرف منذ الصغر بالتعامل مع بعض القيادات العمالية ورؤية تحركات عمالية على الطبيعة وتجمعات والفكرة ان اليسار هو الذى يخرج ليدافع عن هذه المصالح وليس العكس ...اليسار يهتم بقضايا العمال وليس للعمال هم من يهتمون بتدعيم اليسار والعصيان المدنى وغيره
و ان كان مش
و ان كان مش عاجبني زيك تعليق يساري مصري لكن برضه الأمور قد تكون أعقد مما تبدوا
العمال في حالة استنفار بقالهم 7 سنين، و متابعين التفاصيل الحالة اللي حاصلة دلوقتي هي تفاقم لحالة أقدم و بقالنا سنين في شهريا اضراب أو اعتصام عمالي.
لكن في نظري مع كل لفة انخابات نقابية بيحتد الصراع بشدة و يزيد نشاط العمال، يعني رغم أن المطالب مرتبطة بالأجور لكن فيه علاقة ما ما بين مسيرة المطالبة دي و ما بين مسيرة تحرير النقابات.
طبعا في الأصل كلنا مطالبنا تحسين أحوال المعيشة اصلا، هي الديمقراطية دي عايزينها عشان ندخل بيها الجنة ولا عايزينها عشان نعيش أحسن؟ لكن في نفس الوقت مع استمرار الاخفاقات في تحقيق تغييرات جذرية بيبدأ الواحد يهتم بالآليات اللي حايشاه عن تحقيق مصالحه أو اللي ممكن أو مفروض تساعده، أظن فيه درجة من الوعي عند نسبة من العمال المنخرطين حاليا في الاعتصامات و الاضرابات بأهمية التنظيم النقابي حتى لو الوعي ده لم يتبلور لمطالب واضحة و اجماع. أصلا كون أن الاضراب يبقى حالة واسعة الانتشار و في أكثر من قطاع يخليني أحس أن فيه حاجة أكبر.
ثانيا الصراع على الأجور مرتبط ارتباط وثيق بالأسئلة الخاصة بالدعم و مجانية الخدمات و القطاع العام و قواعد الاستثمار و مخططات التنمية، الخ، لو مشمعناش العمال عاملين ربط ما بين اضراباتهم لحسين الأجور و الكلام ده فده يبقى فشل و عجز اليسار و الناس اللي مهتمة بالتغيير و الاصلاح الأوسع.
this is the real activism so
this is the real activism so learn from it and learn well you are lucky to ahve such chance to interact with them
i wish the other "activist" can too
عارف يا مالك
عارف يا مالك ساعات بحس اننا شيعين اكتر من الشيعه نفسهم
:-D
لو تشوف المصرين بيعملو ايه لما بيزورو المسجد النبوي هتنزهل من اللي بيعملوه من اول لمس العواميد الرخام لحد الزعاريط وهما داخلين يزورو قبر النبي
المهم
اول مره اتفق معاك علي كل اللي بتقوله
التغير فعلا لو حصل هيحصل من عند الناس دي
عارف لما بشوف الصور او اسمع كلامهم بحس اننا بنلعب وبهرج وهييه بقي احنا نشطاء وسياسين ومظاهرات ووقفات وحملات
ومبنعملش اي تغيير
انما هما لاء ولا ليهم في الحاجات دي انما لما بيقلبو الدنيا بتقف علي رجلها بجد
بيدوني احساس ان لسه ممكن يبقي فيه امل
عاش كفاح الطبقه العامله
العمال قوه
العمال قوه كبيره تكاد تساوي قوة القوات المسلحه
ولكن ينقصهم حاجه واحده و يكون عصيانهم هو القوه النحركه فعلاً لتحرير البلد
نطاق مطالبهم و الهدف من عصيانهم يكبر
يعني عصيانهم و إضرابهم ميكونش فقط للمطالبه بالعلاوه و لا البدلات
لو خرجوا في مسانده لحركات اليسار او لمساندة معتقلين ضمن حركة عصيان مدني موسع فعلاً يقلبوا موازين البلد
انا من حلوان ساكن جنب المصانع الحربيه بشوف كل يوم جيششششش داخل و طالع
مش اقل من 200 اتوبيس بيدخل عمال غير اللي بيروحوا بالعجل و اللي بيدخلوا من بوابات تانيه
فعلاً نصهم يحرر البلد
يغرز فيهم معاني العصيان المدني المنظم و خد منهم احلى نتائج
http://masr-heya-ommi.blogspot.com/
Post new comment