بيقولك احمد قرر انه يمنع الناس من اكل الرز,راح حاطط ضرائب على الرز,وقفل على كل مزارعين الرز,واشاع في الاسواق ان الرز مش لطيف ومش ظريف,ومش لازم الناس تأكله.

قال ايه احمد الوزير بتاعه اللي بيبلغ الناس بالاخبار مات,راحت زراعة الرز بقت بالاف الفدادين,والناس كلها اللي معاها ثمن الرز بقت تشتري رز بالهبل,وايه بقه فرح.

عدت اجيال وراحت اجيال,وفجأة جه جيل وقرر انه مش لطيف ان الناس تاكل الرز,عشان الرز بيتخن,وبيقضي على الكرامة الانسانية,حاولوا يلاقوا في كل الورق اللي جابه الوزير للناس حاجه تقولك ان اكل رز او زراعته,او تسويقه,او بيعه,او شرائه,او حتى رميه للكلاب ممنوع,او مينفعش,ملاقوش حاجه.

دوري في سلقط,في ملقط,في بلاد السند والهند واللي بيركبوا الافيال,مالقوش.
راحوا طلعوا بنظرية جديدة
ان احمد لما قرر انه يمنع الناس من اكل الرز,قرر انه يخليهم يعملوا دا بالتدريج,حبه حبه يعني عشان نزداد محبه ,فراح حتة حكمته المهوله,والعظيمة,في حاجات تخلي اكل الرز مش سهل,ويقفل عليه,وطبعا ماتنساش ان دائما العيب في النظرية مش في التطبيق,وان دائما في حد طبق النظريات غلط,حتى لو بقالها مئات السنين ,بس برضه بتتطبق غلط,وكل اللي ماشيين ورا النظرية دي,مش واخدين بالهم وبكرة يفوقوا.

عباقرة الناس دول"زيهم زي بتوع ستالين هو اللي بوظ الثورة,ولينين كان طاهر,والثورة الدائمه هي الحل شرع الله عز وجل وكدا يعني"

بس لحد دا الوقت,معرفوش يلاقوا حاجه ولا حتة ورقه زوغيره من مجموعة الاخبار,بتقولك انا احمد كان عايز يعمل الموضوع تدريجي تدريجي,مع انه مممنعش الفراخ تدريجي تدريجي.

عادي بقه,الحاج احمد لما يبقى فاضي,يقرر انه يبقى قاضي.
اكثر حاجه بكرهها,لما مجموعة من الناس تفتكر انها اذكى من بقية الناس,عشان شكلها احسن,لابسه انضف,مؤدبه,قرأت اكثر,او صوتها اعلى,او بتعرف تركز اكثر,اللي بكرهه اكثر,الناس اللي بتنقل خطوات الانجليكيين الامريكان بالحرف,وعايزه تطبقها,زي بالظبط كدا نظرية الخلق الذكي,ونظرية الرز اللولبية.
ياحاج احمد انا لسه بحبك والنعمه خليني احبك للأخر,ورحمة النبي يا شيخ خلي بتوع الكباري يحلوا عن اصحابي.