شوف مش كل الناس بتوع السبعينات كدا,ومع اختلافي لنظرتك عن كيمو,بس شوف الناس اللي انا حاطط روابط عنهم,ناس اختفت تماما من الساحه,فالبتالي مافيش اي شبهة استفادة خالص.
بعدين في ناس محترمه جدا من جيل السبعينات عم احمد سيف وليلى سويف واحمد عبد الله رزة الله يرحمه وكمال ابو عيطة وغيرهم ياما.
كون ان في ناس ركبوا الموجة,فدا حصل مع كل التيارات ومع كل الحركات وفـ كل العالم مش بس مصر.
السبعينات كانت افضل لان بصراحه ولو بصيت بشوية منطقية حتلاقي ان مكانش في اسلاميين بالشكل اللي موجود دالوقت,مكنش في يأس زي دالوقت,كان الشعب مش متقسم طوائف واديان,اه كان في اديان وطوائف,بس كان لكل دينه,ومحدش بيحاول يعمل فتن وحروب.
في اسباب ياما بس السبعينات دائما مرتبطه باليسار ومن وقت ماوقع,اتفرج علي بيحصل,كام مية طالب في الجامعه شيوعيين وكام واحد شبهم برا عملوا مظاهرات عشان قرش زيادة,دالوقت مبقاش في منهم ياما والبلد ماليانه اسلاميين,ومحدش فيهم اتحرك.

فعليا في ناس ياما متابعة الموضوع وممكن لو عندك ديلشيوس تشوف دا,والموضوع بحد ذاته بيجيب رجل من غيرنا للاسباب التالية
انتوا بتقدموا شهادات حيه,ممكن الموضوع ككل معروف واتقرى وحضرنا ندوات عنه ياما اوي,بس لما ناس تحكي من جوا التفاصيل سواء الزوغيره او الكبيرة,لما الخطوات تبان ازاي حصلت,لما دا كله يتحط ووبلاش من ناس شاركت,دي خطوة بجانب الحته التاريخيه والشخصيه والعاطفية,تسمى اننا بنفتح المعرفة اكثر للناس ولو في حتت زوغيره,حتبقى المعرفة مش قاصرة على مجموعات زوغيرة,او على ناس متفرقين,مصدر مفتوح,.
انا مهتم بالناحية دي جدا,ان التاريخ يتكتب من كذا حته,وبكذا شكل,مش يتفرض علينا من مجموعة ما والسلام,والاحلى ان اللي بيكتب الكلام بيتناقش معاك,وبيفنده ويشرحه,ويوضح
دا لطافة الموضوع ان التاريخ بيبقى حي,وحيفضل موجود,بنقاشه اللي ممكن اجيال اصغر مننا تدخل عليه بعدين وتقراه وتشوفه الخ.
فاهمني ياعمنا ؟
الاهم من التجربه,"واللي طبعا هي من اهم التجارب في الخمسين سنه اللي فاتت"ان تاريخها يبقى حي ومفتوح,ياريت تكملوا حكي عن دا,وياريت يفضل مفتوح للنقاش,وللشتيمه حتى:)
الف شكر ياعمنا