من حوالي اسبوعين كلمتني الاستاذة امينة خيري من جريدة الحياة وطلبت انها تقابلني عشان بتعمل موضوع,انا عامة بقالي فترة مقرر اني متكلمش مع حد عشان انا مش متوازن اوي الايام دي لاسباب ياما,بس الست امينة بالذات لان في سوء تفاهم حصل قبل كدا قلت مابدهاش.
اللي حصل ان المقال اللي اتكتب اغلب كلامة يا اما انا مقولتهوش يا اما انا قلت واتكتب بشكل مختلف يا اما اتحط في ترتيب مش ترتيبه .
اقرأالمقال
اول تعليق ليا
على الاقتباس التالي واللي هو يبان انه اني قلته حرفيا
"«كنت قبل دخولي السجن إسلامياً من المنتمين إلى حزب الوسط. كنت راديكالياً بشعاً. لكني خرجت بعد ما تحللت من هذه الأفكار التي تتيح لصاحبها حق الحكم على الآخرين، وهو ما يولد دائرة القمع التي وقعنا كلنا فيها»."
انا قلت الكلام دا بس مقولتهوش حرفيا:)
انا اتوجهلي سؤال اترد عليه اني كنت حزب وسط قبل السجن ,دا مالهوش علاقة خالص بكون الوسط بيحمل افكاري الراديكالية وقتها,او الاسلامية او خلافه,وفعليا,انا كنت بحكي ان تجربة السجن ان كانت غيرت فيا فاكثر حاجه غيرتها هي نظرتي للمثليين جنسيا لا اكثر ولا اقل,طبعا في حاجات ياما اتغيرت فيا بعد كدا بس مكنش جوا السجن,,والسجن مكانش له اي علاقة بها.ودا اللي قلته ان نظرتي وتقبلي للمثليين جنسيا اختلف تماما عن قبل وبعد السجن,يعني لا سياسة ولا حزب وسط وحش او حلو,واللي فعليا دي من الحاجات اللي ضايقتي لاني عمري ما غلطت في الوسط,ولا في اعضائه ولا مؤسسينه واغلب الناس بكن لهم احترام كبير وحب.
الحتة التانيه برضة عن السجن واللي متحط بين اقتباس كأني قلته حرفيا
إن الذين ينكسرون في مثل هذه التجارب هم أصحاب الشخصيات الصلبة، «ومن هنا أيقنت أن المرونة أمر مطلوب، كما أن الشتيمة لا تلتصق بصاحبها».
خالص خالص انا مقلتش الحته الاولانيه دي نهائي,والناس اللي قرأت الكلام اللي كتبته من سنتين عن الموضوع دا حتفهم دا كويس وممكن ترجع له هنا او ممكن تقرأ اغلب الحاجات اللي كتبتها عن الاعتقال من الوسوم اللي على اليمين تحت وسم إعتقالمش معقول حقول كلام واضح جدا انا بتكلم عن الصلابة ازاي واجي اقول عكسة.
نيجي بقه للحتة بتاعة الغير "مرجو"اللي ماليه فقرة في المقال بحكي فيها عن وسط البلد,فعليا انا مقلتش اني برجو شهرة او مش برجو شهرة,انا كل اللي قلته ان احداث التحرش الجنسي,او محرم بك في الاسكندرية,غطيتهم بالصدفه البحته,مش لكوني شاطر,ولا اي حاجه,انا قلت صدفه,لاقلت مش برجو شهرة,ولا اكدت عليها,ولا طلعت اجري وراها,بجد الفقرة دي ادتني احساس ان اللي بيقولها هو بني ادم مدعي جدا وخراء يعني.
وفعليا تاني حتة الملاحقات الامنية اللي مكتوبة في الفقرة القبل الاخيرة
"ويوضحان أن الملاحقات الأمنية التي يتعرض لها عدد من المدونين (كلاهما تلقى طلبات استدعاء) لا تكون بسبب التدوينات نفسها، ولكن بسبب نشاط سياسي فعلي أو مشاركة في تظاهرة أو اعتصام أو دعوة الى فاعلية أو إضراب أو ما شابه."

فعليا بقه انا قلت ان محدش اتسجن وبكرر اتسجن الا عشان هو له نشاط سياسي بجانب التدوين,مش عشان هو مدون وبس والوحيد اللي حصله دا هو كريم عامر,انا مقلتش خالص ملاحقات امنية لان عمرو غربيةتم التحقيق معاه واستدعاءة في النيابة على خلفية موضوع القاضي عبفتاح مراد,ومنال وعلاء اتبهدلوا في قسم الدقي ومديرية الامن عشان نفس الموضوع,وحوالي 50 مدون كانوا حيتسحبوا على المحاكمة دي ومن ضمنهم غربية وبنت مصرية ومنال وعلاء وووائل عباس وناجي وانا,وياما غيرهم.
وفي مدونة في اسكندرية قفلت مدونتها بناء على تعليمان امن الدولة المصرية بعد ماخبطت في ابن الهبله بتاع ليبيا القذافي,ومحررة موقع التعذيب في مصر تم استدعاءها برضه لأمن الدولة وغيرهم ياما.
فانا فعلا مقولتش خالص ملاحقات امنية,انا قلت محدش اتسجن,اتسجن,في فرق بين السجن والملاحقة الامنية,,اللي ممكن تكون تحقيق من عسكري.
اخر كوبلية في المقال بقه
"ثم يقول بلهجة الحكماء: «حسبتها بالورقة والقلم، فأنا محتاج إلى ألف جنيه شهرياً لأدفع إيجار الشقة والفواتير وأكل العيش الحاف. كلمات غريبة؟ ربما. لكنها بالطبع ليست حمقاء."
وحياة امي دا ماحصل,ولا حكماء ولانيلة,انا اتسئلت بتكتب عن ايه الايام دي؟قلت بشتم في الجيش والعيش,وقلت اني حسبتها في تدوينةورحت مطلع التدوينة وخلتها تقرأ الحتة بتاعة الحساب دي,لا حكماء,ولاورقة ولا قلم ولا غيره.
يعني انا مش عارف ليه دا حصل,ممكن يكون انطباع منها,كلامي متفهمش كويس,مشكلة في الدسك بتاع الجرنال ,الله اعلم,بس انا قلت اوضح,من غير قباحة,عشان بجد انا احترمت الست,ومبحش اشتم حد بحترمه انا.