الكلام تزاويق,كل ماكنت صنايعي شاطر كل ماكنت قادر تقدر النقاشه,الازمة دايما بتتوجد,لما بتقرر انك تحب المساحات الفاضيه,والحيطان البيضاء بتاعة المستشفيات,ساعتها حتبقى صنايعي كلام فاشل,ومش حتعرف تطلع التزاويق اللي بتبهر,وبتكدب.
حتى الاحاسيس تزاويق,كام رسمة حلوه,وصورة,وبيتين شعر,يخلوك نبي,ولا اله فعليا مش فارقه,المهم تكون بتعرف تملى الصفحة البيضا,بالوان حسب احاسيسك,الازمة بتتوجد لما تكون بتحب الفراغ,ساعتها لا حتملك الوان,ولاحتعرف توصل.
زي الكهربا,محتاجه اسلاك,وفيشه,وعشان الفيشة لازم يبقى فيه في الحيطة بريزة,لطيفة فكرة العاشق والمعشوف في كل حته,حتى الكهرباء لازم لها فيشه وبريزة,بس من غير تخريم في الحيطه ياحمار,مش حتعمل البريزة,ومن غير الحيطه,مش حيبقى فيه اسلاك,ازمتك انك مغفل بتحب البراح.
لازم تبقى متوصل بسلك عشان تشبك انترنت,حتى اللاسلكي,محتاج له راوتر والراوتر بيدخل جواه سلك,عاشق ومعشوق,وكله تعشيق زي العربية,من غير تعشيق حتشرق,تعمل ايه,لو مبتعرفش تسوق ومبتحبش الاسلاك,وبلدك مافيهاش واي ماكس؟
تصدق؟كله موصل لكله,وكله منفد على بعضه,مش لازم تبقى ذكي,ممكن تبقى حمار,بس حتى الحمار بينهق,تعمل ايه وانت فاقد نعمة الكلام,ونعمة الزواق,انت حتى مبتعرفش ترسم,ولا حتى تلون,بتحب الاحمر والاسود,ودا دليل على انك من جوا مش حلو,ومش حتعرف توصل ولا تتواصل وحتى توصل.
بيقولك عشان تعزف محتاج اوتار والاوتار متعشقه في العود او الجيتار,وايدك نست ومبقتش فاكره,فين تعفق,وازاي تدوزن,مش بقولك,انت وقفت عند الغوريلا,ورفضت تتحرك,او ممكن فرضا كدا على جمب كان نفسك تفضل متشعلق ع الشجر,وتحدف الناس بالطوب او الموز,وتطلع لهم طيزك.
حمرا,حتى اللون مابقاش له صاحب,مابقاش له معنى,مبقاش غير فانلة فرقة مبتخسرش,وبقى يوم وعندنا دون عن كل البشر يومين فلانتين,وورد وتي شيرتات,وميداليات,وافقع شوية زواق,وحمرة على الخدين,وايش تعمل الماشطة ان كان اللي بيتكلم حمار ؟
بيقولك يسخطوك ياقرد,ويعملوك بني ادم,ترسم وتلون وتعمل فيها كائن,ظريف ولطيف ودمه خفيف وبتاع نكت وصحبه وكلمتين وصباح,يعني انت مكانك في متحف الحفريات.
اشور عشتار,ولا حتا حتحور وكان عندهم برضه ايوب ونوح وعدرا,وواحد كلم ربنا في ساعة صفرا,واخد منه برضه ألواح,ولوح ولوح ولوح,ماهي كله لعبه,وافضل انت زي الحمار,إسمع انشاد وفقر في مولد سيدك الحسين,اللي راسه عندك,وجتته في سومر.
حتعوفر؟حترجع تاني,مانتا سكتك واضحه,لا بيضا ولا سوده,ولا حتى كاروهات,سكتك زي المزلقان,ومرجيحة البدوي,ماهما اتشقلبت فيها,حتفضل تلف,لحد ما تخلص الدور,وتسلم النمرة.
وحتفخر في يوم انك عشت ومتت حمار,لا خنت ولا غشيت ولا كدبت ولاسرقت,بس كنت حمار,وياريتك عندك زي بتاعه,انت يادوبك حمار في المخ مش في الجته,يلا اهو نوبه وتعدي,وتبقى تراب,او رماد,وخلاص.