ساعات الحاجات تبقى مش مفهومه وساعات تيجي ورا بعض فتبقى مفهومه,ساعات الحاجات بتجري ورا بعض لدرجة انك ماتقدرش تشوطها,لدرجة انك متقدرش تشوفها,ساعات الحاجات بتستخبى ورا بعض,وساعات لثانية بتجيلك في رؤية,ساعات بتحس انك ملكت كل شئ وساعات بتحس انك ملكش أي شئ.
ساعات في عز الضلمة بتفتح,وساعات في عز الخوف بتشوف.
ساعات,بتحس انك عايز ترجع لزمان اوي قبل الزمن دا بزمان,وانك تسكت,تفتح كراستك,وتستنى جرس الحصة لمايضرب,عشان تقف في الشباك وتعاكس البنت اللي فـ المدرسة اللي جنبك.
اوقات عملت فيها سبع البرومبه,ورنيت كل صحابك علقة,عشان تبقى انك الاسد,وساعات,مسكت كتاب,عشان تبان انك عبقرينو القله,وساعات عملت قرد,ولبست صديري عشان تحن عليك بنظرة.
ساعات بتخاف من النور,وساعات بتكره الضلمة
ساعات بتحس انك عايز ترجع كهفك,تولع نارك,وتمدد رجلك,مش عايز غير انثى وحتة لحمة,وكام ورق شجر تمسح بيها خرمك.
دائما بتحلم الشتا,بس الغرابة انك بتكره العتمة
محدش بيتعب نفسه بكلمة جديدة,كلهم بيحرقوا بعض على اعراب خاطئ,او مثنى ومذكر,محدش حاول انه يخترع,الكل بيلف في نفس السكة ,سكة التزاويق.
ماهي كل حاجه متزوقه,حيفضلك انت ايه ياحمار البين؟
ماهو ماينفعش تبقى غراب,الغراب حتى في سواده جمال,ومنقارة ومشيته,وفردة جناحيه,كل حاجه فيه الا الصوت معجزة,يبقى ازاي تبقى انت زيه ؟
مافيش جديد في الكون,حتى الاحتباس,والتصحروحتى العصور الجليدية,كله حصل قبل كدا مع اختلاف الاسباب,اموت واشوف حاجه واحده جديدة,اموت واشوف احساس واحد فريد.
اهو دولاب وبيلف,ينزل هنا شوية ميه,وينزل هناك زفت,الاكادة ان الميه كلها بتطلع لفوق,ومابيفضليش انا تحت غير الزفت.