امي بتتصل بيا بتطمئن ان كان اتقبض عليا ولا لسه :),بحاول افهمها ان بين القاهرة والبرلس 4 ساعات مثلا,بس هي راسها والف سيف اني اروح لها .
امي حضرت اكثر من اعتقال لابويا وعمي وجدي,واخو جدي,وجارنا,وابن جارنا,اعتقد ان امي شافت كل انواع الاعتقال"اخوان,جماعة اسلامية,شيوعيين" ومع ذلك لسه بتخاف عليا,مع انها مسلمه امرها,وخلاص.
طول الوقت بتصعب عليا,مقدار الرعب اللي انا مسببه لها غير معقول,مع ان كل الناس بتحاول تطمئنها,بس برضه.
الامهات اختراع عظيم طول الوقت,مهما غضبنا منهم,زهقنا,حسينا ان في فروق ضخمه في الوسط,بس بيفضلوا امهاتنا.
نفسها تشوف عيالي,مع ان ابويا خلفني وعنده 30 سنة,يعني لسه فاضل لي 4 سنين ,بس برضه حلمها انها تشوف عيل,الازمة اني مش شايف انها خطوه صحيحه اني اخلف عيل يطلع متخلف اكثر مني,او اني اتجوز في الاساس واطلع دين ام مراتي واللي خلفوها.
ست طيبه جدا,رغم زعيقها,وخناقها,ورغم عضها ليا المستمر وانا زوغير وضحكي عليها لما سنانها توجعها وانا مش حاسس بحاجه .
امي ست مصرية فعلا,ان كان فعلا منطقي ان اقسم الامهات او ان في حقيقي اختلاف بين الامهات حسب الجنسيه,بس شافت ياما,انكسرت ياما طول السكة,اتخدعت ياما,انضحك عليها اكثر,بس كل مره كانت بتقف على حيلها,وعمرها ما وقعت وماقامتش.
ممكن عشان كدا انا بعتبرها عظيمة,عشان رغم كل شئ عمرها ما يأست,عمرها ما اتخلت,عمرها ماكبرت دماغها,رغم كل الاسى اللي شافته.
عمري ماشفت حد بيتكلم عن ابوه بنفس العظمة اللي بيتكلم بيها عن امه,ممكن عشان حقيقي الام في مجتمعاتنا هي اللي بتقوم الاسره,هي الوتد اللي بتقوم عليه كل حاجه.
من 10 سنين,كنت بقول اني لما اشتغل مش حخليها تتعب,حعطيها اول مرتب ليا,وعدتها اكتر من مره اني حعمل دا,وهي بتقولي لا .
اخدت اول وتاني وتلاتين مرتب,وعمري ما اعطيتها ولا مرتب,وهي عمرها ما قالت لي حاجه,بتقولي كفاية انك بتصرف على نفسك بقالك كام سنة,غيرك لسه بياخدوا مصروف,بستغرب لما يكون دا المقياس,ان شحطه عدوا الـ23 ولسه بياخدوا مصروف,بس دا بقى المقياس,اني مستقل وعندي بيتي وحاجتي ودا في حد ذاته شئ بيجعلها تفخر بيا وسط مجتمعها.
حقيقي غراب الامهات,تحس انهم ساحرات,متلاقيش رجل يقدر يقول ان اكل مراته احسن من اكل امه,او اي حاجه بتعملها مراته احسن من اللي كانت بتعمله امه,حتى لو امه كانت فاشلة تماما,بس برضه هي الاحسن.
دالوقت اخر وعد وعدته لأمي اني اجيبلها جزمة طبي محترمه,عشان سنها وكدا,على الرغم انها عندهااكثر من وحده,على الرغم ان الوعد دا له سنتين,بس لسه مستنيه جزمتي .
الامهات حيفضلوا الساحرات الطيبات اللي بينفذوا كل طلباتنا لمجرد اننا نكون سعداء.