ساعات الحزن بيحفر جوا الصدور اخاديد,ومجاري انهار الفقر ترويها,ساعات الناس من كتر حزنها بتنسى كونها ناس.
ساعات من كتر الحاجه بيتنسى انه له حق يعيش,او له حق يبتسم في ساعه ما,في وقت ما.
ساعات تراكيب الكون من حوليه تخليه مندهش,وفاغر يا حضرات فاه,ساعات الموت بيجري في الشوارع بالليل من غير ما يوقفه عسكري مرور,من غير ما حد يقوله بطاقتك,او اركب البوكس يا بن الوسخه.
الموت عندنا اعلن جمهوريته,وقرر ان الناس مش مفروض تعيش,بس كتير عليهم الموت,لازم تشتاق للموت عشان جنابه يعلمهم الا يشتاقوا.
عندنا في شوارع المنيرة,قدام المستشفى,او القصر العيني قدام المستشفى,كل واحد من الواقفين ماسك بطاقة,تصريح خروج من الدنيا,مستني الحكيم يختمهاله,يبصم عليها اذن الخروج.
عندنا في مدقات القرى جلاليب سودا,ماتعرف جواها صبي ولا راجل ولا ست,جلاليب سوده مش مهم انها تكون في الاصل سوده,المهم انها دالوقت اصبحت سودة.
عندنا العيال مش عارفه انها عيال,محدش خبط على كتفهم,محدش صفر زمر وقالهم افرحوا,محدش قالهم العبوا,محدش حاول يفكرهم انهم عيال.
عندنا العيال من معهد السرطان سلطان البلد,وكيل اول وزارة الموت,لمستشفيات غسيل كلى ,او طوابير زراعة كبد,عندنا لكل مواطن كفن,يختاره بنفسه,ابيض,اسود,كاروهات,المهم انه قبل الكفن,ياخد اذن الخروج.
عندنا الفقر,الحزن,الموت بقى اكثر من صاحب,بقى حد من العيله,تقوله صباح الخير,يقولك اقعدوا بالعافية,عندنا الحاجات من كثر مابقت غريبه,بقت جزء من الجته,حتة من الجلد,لا ينفع تروح,ومش قادرين حتى نطاهرها.
ساعات بحس بالعته,مش جديدة اوي انا مولود معتوه,بيقولك الداية نزلت فيا ضرب عشان اصرخ اول مانزلت من بطن امي,بس انا كنت مكسل اصرخ,مكنتش فاضي,كنت نازل مندهش.
بس دالوقت,العته بقى غريب,في درجة جديدة من العته بحسها لما بندهش,تخيلوا بقدر في اوقات كدا اندهش,لما اللون الاسود يكسل حتى انه يبقى جوانا,وبداله يبقى جوانا تراب.
مش طينه حتى,الطينه حتى ممكن تنزرع,شوية فول وبصل,واهي مقضية,التراب صحراوي,وفيه مخلفات ذرية,زي اللي لاقوها في سيناء,رامينها الصهاينه.
غريبه,حتى التراب دخل العصر النووي,دي حاجه تسعد,دالوقت توكيل الموت فرع شوارع مصر,لقى له منتج جديد.
من كثر الضياع,بقت كل حاجه شبه بعض,اكوام اللحم قدام المستشفيات,زي اكوام اللحم جوا العربيات,قدام الكراكونات,او طوابير الافران.
من كتر كل حاجه,بقت اي حاجه,زي اي حاجه,من كثر الحزن في البلد دي,الفرح جاله عقد عمل برا,وركب فلوكه,وغرق في المالح,ماهو كله بيموت يعني هي جات ع الفرح.
ساعات من كثر الحزن,بيتحفر جوانا الخوف,كلب جربان,بيفضل يجري في الليل والنهار,من كثر الخوف,الكابتن موت قرر اننا منستحقش غير اننا نجري من كل الكلاب الجربانه,لحد هو مايزهق ويرحل,او يقفه عسكري ويقوله اركب البوكس يابن الوسخه.