MaLek X

ساعات حاجات لطيفه جدا في عمرك بتخلص
الطف حاجه انها كانت بتكلمني وبتسئلني مالك في ايه؟من غير ماكون شفتها او كلمتها من فترة طويله,وبيكون فعلا فيا حاجات زي الخرا.
وكنت بقولها مالك في ايه وبيكون جواها حاجات زي خرا.
مكنتوش محتاجين تتكلموا ياما عشان تفهموا بعض,كنت بتحس انكم عندكم حواس بدائيه جدا,من قبل اكتشاف اللغه,من قبل اكتشاف اصوات التخاطب.
اكتشفنا حاجات ياما سوا,اتصدمنا في حاجات اكثر سوا.
ساعات الحاجات الحلوه ميبقاش في بد من انها تنتهي,لان الناس خلاص مبقتش قادره تدي اكثر من كدا,المحطه وصلت والاتوبيس بيفضي الركاب,ولازم الناس تنزل,وتركب من محطه تانيه.
ساعات بيبقى مش اختيار,ساعات بيكون لزام عليك انك تقول انا لازم انزل المحطه الجايه وتقف عند الباب وتنزل,برغم كل حاجه,برغم انك فعلا مكرهتاش,ومستحيل طبعا تكره,على الرغم ان عمركم مااتخانقتم خناقة بجد,عمر ما حد فيكم شتم التاني او جرح التاني في لحظة زعل او غضب,بالرغم من كل شئ,لازم المواضيع تنتهي لانكم مبقيتوش قادرين تعطوا لبعض حاجه.
اكيد حتفضل تفكر فيها,اكيد هي ممكن تفكر فيك,ممكن في يوم قريب او بعيد تبقوا صحاب اوي,ممكن وهي بتقرى الكلام دا تفتكر حاجات ياما,ممكن تكون نفس الحاجات اللي بتفتكرها ومش بتكتبها.
ممكن كل شئ,الا شئ واحد,انكم ممكن تركبوا نفس الاتوبيس تاني,لان المصلحه لغت الخط دا,وماعدش ينفع يتركب من جديد.