MaLek X

ومحدش عارف كام واحد في السكه مننا حيقع,,ولا حد داري كام واحد مننا وقع,سكه منفده على سكك,ولا حد عارف امتى بدأ,وامتى من الخضه حيقع.
مش لازم تكون مبسوط,مش لازم تكون حزين,مش لازم تكون اي حاجه غير انك تكون حاسس,تقدر تحس بلسعة النار,تحس بلسعه البرد,تقدر تحس انك عايش,وبس.
كام واحد نعرفه راح,كام واحد منعرفهوش مبانش,كام واحد كنا ع رصيف واحد اختفى,وكام واحد وسط مظاهره صرخ واتخرس,كام واحد كنا نعرفه,بقينا منعرفهوش,كام واحد حبيناه,مبقيناش نقول لبعض صباح الخير.
مش لازم تكون بتتحرك لقدام,مش لازم تكون بتتحرك لورا,المهم انك متقفش في وضع الثبات,المهم انك دائما تتحرك,اوعى تقف,الثبات يعني موت.
كام حاجه عوزناها,مبقيناش نعرفها,كام حاجه حلمنا بيها,نسيناها,كام حاجه دورنا عليها,تاهت مننا,ومش فاكرين عنها حاجه.
مش لازم تنسى,محدش بينسى,طبيعي تحس كل فترة بالفقد,طبيعي تحس بحاجات ياما,طبيعي انك توحشك حاجات,توحشك حاجات تانيه ساعات,طبيعي انك تحس بكل حاجه واي حاجه,مش مهم تكون صح او غلط,المهم انك تفضل تحس.