MaLek X

مش لازم تفهم,مش لازم تشوف,مش لازم تعرف,مش لازم تفك الخط وتقرى الحروف,مش لازم تعمل اي حاجه غير انك تبص للحيطه,وتكرر نفس الجمله من نفس الاغنيه.
انا واد خيال عاشق الترحال ع قد الحال,لكن ميال,مواعيد مواعيد,كله بميعاد فرقتنا موت,ولقانا ميلاد,قلبي يا غريب دي الخطوة نصيب والفرح قريب,يانغم ولاد.
ماهو مش كل مره تقول انك غريب,مش كل ماتبدأ حاجه بعد فترة زوغيره تحس بالغربة,ماهو مش منطقي كل ما تضيع منك حاجه تشتاق لها,ولما ترجعلك تستغرب منها,ماهو امتى حتحس بالوطن,وامن حتحس بالانتماء؟
ياطير,يامحني الجناح والريش,ياطير,مين علمك تبكي,تبكي ولا تغنيش.
حتفضل تايه,لاعارف اول الحدوته,ولا عارف اخرها,دا حتى تاريخ ميلادك,له اربع تواريخ,يعني حتى ميلادك,مش عارف كان امتى,ولا يوم ايه,وكل رواية بتختلف عن الثانيه,حتى امك يا فقري مش فاكره التاريخ بالظبط.
بالظبط زي اي نقطه,اتكتب في وسط السطر,ومحدش حيلتفت انها موجوده في الاساس,وممكن او غالبا او من المستحب انها تنمسح لانها بكل بساطه,مالهاش اي لازمة,واللي خطهامش فاكر اتخطت ليه.
يعني جيت وحتمشي,من غير ماتعرف امتى المجئ وامتى المغادرة,مافيش تسجيل زمني معروف بالنسبة للإثنين,في اقتراحات لطيفة,ظريفه,مش مفهومه ولا معروفه.
تنبسط كان الهدف,والتحقيق دائما ماساوي,وعمره مابيحصل,بتدخل بصدرك,زي اي فتوه,وفي النهاية الفتوة ديته غزة مطوه,ولا ضربة شومه على يافوخه,والسلام,وبتنتهي الفتونه,وبتنتهي الحدوته,وعمرها ماكانت غير ملتوته.
كله تايه في كله,ماحد فاهم مين عارف ولا مين شايف,كله بيبحلق في كله,عامل نفسه فاهم,وواخد باله,بس كلها بحلقه,لاحد شق الصدر,ولاحد فتح القلب,ولاحد بص من تحت البيبان,وشاف النور.
افتح ماتفتح,او حتى تسمر كل البيبان,ماهو كله محصل بعضه,لاانت حتفرق,ولاغيرك قبليك فرق,كل ماشي على نفس الطريق,اللي عامل زي الخط المستقيم,ممكن تقع من عليه,بس عمره مابينتهي.
مهما بحار السفر بتسرقني والريح بتجرحني مهما بلاد الدنيا تنكرني والكل ينكرني نظرتك بتعرفني ضحكتك بتندهني,من عنيكي.