نقطة نور
للسواد درجات مختلفه,وغير متشابهة,انك ترجع تسمع مزيكا عارف اد ايه هي
بتكئبك,وعارف اد ايه هي بتخليك تحت بشكل غير طبيعي.
للسواد درجات,من الكئابة,الاحباط,درجات من الموات المختلفة الطعم
والرائحه,واكيد مافيش لون,انت مش في سواد يا كابتن ولا حنهزر ؟
انك تكون حمار اعمى حقيقي,مش موضوع رخم اوي,بس الازمة انك تكون فاكر انك
مفتح,هنا الضحك بقى,انك بتحاول توصل,بترفس,بتخبط,بتنطح,بس مش حتوصل,طبعا
السبب واضح,عشان انت اعمى وحمار يا ابو الكباتن.
كونك بتلف في سواقي انت اول واحد صممها لنفسه,لمجرد انك تهرب من المضي
للأمام,لمجرد انك بتجتر كل فشلك,اخفاقك,حزنك,او احباطك,وبتعصر عليهم
لمونه,ولا كاس جن مش حنمانع.
صباح الخير,مساء الخير,يوم الخير,اهو كلها حاجات بتجري وراء بعض,ممكن
تتشعلق ورا,ممكن تشخبط على الحيطان كشكل من اشكال التضليل,بس يفضل احساس
التيه موجود,مش حيتغير,مش حيكون مختلف,دائما تايه.
بص بقى,ماهو في نقطة نور,وانا بروح لها,استنى علي بالراحه,انت عارف ان حوصل
للنقطه,عارف ان حلمسها,عارف ان حكون فيها,متتخلاش عني وانت شايفني
رايح,وانت شايف ان في امل,ماتقررش تسيب ايدي في نصف الشارع,لمجرد ان ابن
كلب زبالة.
دوشة مزمنه,رتيبه,مش بتتحرك,مش بتتغير,بيفضل صوت الوش في ودانك,زي صوت
مروحة مولد الطاقة في الحاسوب,مافيش جديد غير وشششش وشششششش وزيادة شويتين
في الوش اللي بياكل جوا دماغك.
زي سمكة دليل المسافر المتصعلك في المجرة,بس هنا الوش بيتغذى على اجزاء
دماغك,بيمز بمخك,وبيشرب معاه كاس ويسكي امعانا في نرفزتك,لانه عارف اد ايه
انت بتكره الويسكي.
"انت بتتوه في التفاصيل,وهي اللي بتستغرقك مش انت حتى اللي بتستغرق
فيها,وبتضيع منك الصورة الكبيرة"
شوف,مافضلش غير نقطة نور واحده فاضله لي,دي اخر نقطة نور ممكن اوصلها,بغض
النظر عن مدى استهلاك الكلمة,واد الجمله بتتلاك في بوق اي بني ادم,بس حقيقي
مافضلش قدامي غير نقطة نور واحدة,لو سمحت,لوسمحت............
- قرأت 607 مرات
التعليقات
تحيه طيبه
تقبل مروري
الشيء اللذيذ
الشيء اللذيذ والعجيب اني حاسس -واوعى تسألني ازاي- انك ماشي صح
وان نقطة النور دي هي اللي ح توصلك
مش مجرد لأنها نقطة نور يعني مختلفة عن السواد.. لكن لأنها واخدة من كل ألوان حياتك.. أغلب الألوان المشرقة وبعض الألوان الكئيبة.. ما هو غلط اننا نفتكر -على رأي العسيلي- إن الطريق الصح -أي طريق صح- ما فيهوش سعادة.. لكن غلط كمان اننا نفتكر انه مفروش سعادة وإلا ح يبقى طريق خارج الدنيا اللي احنا عايشينها أصلا.. الدنيا العجيبة اللي بتقول لنا ان اقصر طريق بين نقطتين هو الخط المستقيم لحد ما الفيزياء والفلك يلبسونا الخازوق التمام: "هو صحيح اقصر طريق بين نقطين هو الخط المستقيم، بس فيه تفصيلة صغيرة يا ريت ما تضايقكش يا كابتشن: مفيش خط مستقيم...!"
عشان كده بقول لك انت ماشي صح.. حتى لو حسيت انك ما بتتغيرش تغيير جذري.. لأنك أكيد يعني كنت إنسان برضه مش شيطان مثلا
كمّل..
وبس كده
:)
وَمَنْ
وَمَنْ أَعْرَضَ عَنْ ذِكْرِي فَإِنَّ لَهُ مَعِيشَةً ضَنكًا وَنَحْشُرُهُ يَوْمَ الْقِيَامَةِ أَعْمَى
كنت عارف معناها زمان
أكيد دلوقت نسيتها .. أو بتتناساها
بارك الله فيك
بارك الله فيك يا سيدنا.
نوعدك اننا ماننسهاش ماحيينا.
الا قولي,هي العيال اللي بتموت في الشارع كانت اعرضت عن ذكره برضه ؟
ولااللي بتغتصب؟
ولا اللي بيموتوا من الجوع ؟
ولا اللي بيبيعوا جسمهم من الفقر ؟
ولا اللي بيتزلوا ليل ونهار عشان لقمة العيش ؟
ولا اللي بيعتقلوا ويغتصبوا؟
ولا ولا ولا ولا ؟
يا عم الحج والنبي,ماتخلنيش اقولك كلام يزعلك مني,انا مش عايز ازعل حد الايام دي.
ابقى بخير :)
علِّق