MaLek X

لطيف انك تحاول تلزق كام حرف الشاشة,وتقراهم بعد ما تخلصهم,لطيف احساس التوهان دا,والألطف,انك تحس انك انجزت,هطل.
القدرة على التفكير,صعبه شويتين,بس بتحاول انك تقول انك بتحاول تفكر,في مشهد لطيف جدا لهومر سيمسون"اسشهادي بالسيد سمسون لا يعني بأي شكل من الاشكال,كوني فتى مدلل,بعد حداثي,يتمرد على اللغة الأدبية القديمة,ولا على الافكار السائدة,من الاستشهاد بعمالقة التاريخ الباقيين الباقيين,اكثر من كوني,بلابلا بلابلا بلابلابلابلا".
اه مشهد هومر سمسون,في فيلم زا سمسون,مش في المسلسل,متلغبطش نفسك معايا.
اه المشهد
المشهد كان فيه مارج,مراته العزيزة,ذات الشعر الأزرق المنتصب"منتصب هنا ليس ذا اي دلالة,على كوني ذكر,او عندي حاجات ممكن تتنصب,وممكن متتنصبش,ولا له اي اسقاط من اي معنى,او نوع,واخد لي بالك ؟".
اه مارج زوجته العزيزة,بتكلمه وبتنصحه,وهو طالع من دماغه بالونة كاريكاتير,فيها قرد عمال يضرب ع الطبلة.

بالظبط,هو دا مفهوم التفكير,لما تكون مش قادر تفكر خالص,وبتحاول تفهم اللي بيتقالك,وميبقاش عندك غير قرد على طبلة.

درجات من الفراغ حقيقي مطلوبة,بس لما تحس ان دماغك بقت بالضبط زي البطاطس المهروسه"حقيقي ماردتش اقول ماش بوتيتو,لإنتمائات طبقية,ومحاولات التحامية بطبقات الشعب العامله,في محاولة ابدية مستمره,لتعريف معنى كلمة الانتماء الطبقي,ويعني اصلا كلمة انتماء,ويعني ايه اصلا كلمة طبقة,ويحرق دين ماركس,على اسمه التاني بتاع انجلترا".
اه دماغك بطاطس مهروسة,ومافيش جواها اي ملامح لأي حاجه,وهي في الاصل عبارة عن سائل هلامي لزج"مش حنقول ابيض,عشان منحملش كلامنا اي معنى جنسي,قبيح مالهوش معنى,او لازمه,احنا ناس مؤدبة,ومش ذكوريين بالمره,ولو دا كان المعنى اللي وصلك فأنا بعتذر".

المفروض لما تحزن تعمل ايه ؟
"مافيش حاجه اسمها مفروض"
يعني ايه لما ؟,مااحنا دائما حزانى,ودا يؤدي بنا الى السؤال الاهم:
يعني ايه اصلا تحزن؟
ونيجي للنهاية طبعا,وهو السؤال المهم
تعمل ايه ؟
الازمة,حقيقي ازمة,ان كل كلمة ممكن تقولها او تكتبها,ممكن يكون اصلا معناها مش في دماغك,ومتعرفهوش,مجرد كلمة.
"ممكن خمستلاف بني ادم,قاعدين ع البورصة,يقولوا نفس الكلمة,وادراك كل واحد للكلمة مختلف تماما,عن التاني".
الفكرة بقى,ان اصلا يعني ايه تعريف الكلمة الواحدة ؟
تعريف الكلمة الواحدة,حسب ما بيقولها الشخص؟
يعني لو قلت كلمة,وقاصد بها معنى معين,هل دا تعريف الكلمة ؟
او تعريف الكلمة,زي ما المستقبل بيستقبله؟
او تعريف الكلمة,زي ما طرف "محايد",يقرر ان دا التعريف الصحيح للكلمة الواحدة؟؟؟؟؟
حقيقي,لو مهربتش بسرعه من التفصيلة دي,مش حخلص,لان مافيش حلول.
الفكرة,مش اللي انت بتقوله,بيكون قصدك به ايه,لو انت موجهه لشخص محدد,الفكرة,اللي انت بتقوله,اللي قدامك حيستقبله,(دا في حالة انه استقبله اصلا),حيسقبله ازاي؟
فكرة,كلمة,فعل,لمس,اي شئ.
في النهاية احب ارحب بكم جميعا,واقولكم,اني في بداية الطريق.