MaLek X

بحترم الناس اللي بتقدر تكتب عن الاشياء السحرية, عن فوانيس علاء الدين, وعن عتبات الاضرحة, وممكن عن ارصفة الميادين في الخامسة فجرا.

بحترم الناس اللي بتقطر رومانسيه, حقيقي "مش بتريق, تتريق, متتريق, تريقه, تخيل انت بتضيع قد ايه وقت معايا, وانت بتقرى مابين الاقواس, شئ سخيف صح ؟,نرجع لموضوعنا".

بحترم الناس اللي بتحب الرجل اللي كتب الف عام من العزلة, هو رجل عظيم حقيقي, ولهم حق انهم يحبوه, انهم يحاولوا يكتبوا زيه, ويعملوا اكثر من ترجمة, لكتاب غانياته الحزينات وذكرياتهم"بحترم الرجل اللي بعد ما يعدي السبعين, يبدأ يفكر ان المرأة مخلوق مساوي, مش مخلوق ناقص قضيب".

بحترم الثورة, والثوار, طبعا الثوار رومانسيين, دمويين, شجعان بطبعهم, اومال, شفت ثائر واحد مش رومانسي؟, ان كانت فكرة الثورة في حد ذاتها فكرة رومانسيه"في تعريف الرومانتيكية, هل هي في الاصل لها علاقة بالرومان ؟, وكونها اتربطت باللغة الفرنسية في تطورها, وانها تعني اسلوب الحياة الروماني؟,طبعا طبقا لويكي بيديا الكلام دا صح, وبالتالي ممكن نفهم العلاقة الوثيقة بين الرومان,رومانسية,ثورة,دم".

العلاقة مركبة, من حيث انها بسيطة, ان اصل الاشياء واحد, وكلنا من ادم, وادم من طين, والطين احد العناصر الاولية, مع الماء والهواء, والنار, وبما اننا بنرجع لفكرة العنصر الواحد حسب الاديان, فالبتالي كلنا من طين, بس احنا بنحب نسفسط الامور, ونكعبلها,ونعمل فيهاافهم الكائنات, وجنوم, وذرة, وجينات, وكلام بعيد عن الغيبيات, يا قوم, دحاها,دحاها.

لو فهمت الفقرة السابقة, فبهنيك ع ذكائك الالمعي, حقيقي, انا بطلت اتريق من فترة, فأكيد مش بسخر منك, بس ممكن تقولي بتقول ايه؟

انت موجود, بتمشي في خطوط مستقيمة, بتاخد الخط من اوله, وبتنزل في اخره, ولا موجود في دائرة, بتلف وبتتعاد معك كل الاشياء, وملكش بداية ونهاية, بس مجموعة من الصور المختلفة, في كل نقطة من نقاط الدايرة,السؤال الاحسن, انت موجود ؟يعني بتشغل حيز من الفراغ"بس المعضلة, لو انت بتشغل الحيز دا من الفراغ وانت وسط الفراغ, فالبتالي مين اللي بيحتوي مين؟
الموجود اللي بيحتوي الفراغ, ولا الفراغ هو اللي بيحتوي الموجود؟".

بحترم الحب, حقيقي مخلوق جميل, وردة,وشيكولاته,واغنية حلوة, وزجاجة عطر, وكتاب لماركيز, عشان تعيش عوالمكم السحرية سوا"بتمنى في الحالات الشبيهه اننا نكون في القرون الوسطى, ويتم حرق كل اللي بيتكلموا عن العوالم السحرية, والسحر الكامن في الكلمات, والاحاسيس السحرية".

اعزائي, احنا في الدقيقة الاخيرة, من عمر النتيجة الكونية, بدأنا في الدقيقة دي, وحننتهي في نفس الدقيقة"حقيقة علمية, بيتعلمها العيال برا في ابتدائي, بس احنا ممكن منعرفهاش الا في اواسط واواخر العشرينات, وممكن منعرفهاش خالص في النهاية ".
في النهاية, اتمنى لكم عام دراسي سعيد, وبالنجاح في الصف الثالث الابتدائي, وعقبال ما تحصلوني في سنة اولى ابتدائي.