MaLek X

درجات التعقيد مختلفه حقيقي.
دالوقت انت محتاج تكتب حاجه, بتفكر في النص انك محتاج تشرب حاجه سخنه, في نفس الثانية اللي حاسس فيها ان وشك مترب جدا ومحتاج انك تغسله, وانك بعد الغسيل, ممكن الموضوع يكبر وتقوم عامل عملة الاستحمام" بفضل استخدام عمل بدلا من فعل, لأسباب لها علاقة بالمزاج الشخصي الحالي".

ايه فكرة انك تصحى كل يوم الصبح, عشان تنام في نفس اليوم بالليل, طبعا علاقتك بالكرة الارضية هي نفس علاقة الكرة الارضية بأي حاجه تانيه غيرك, انت مش مركز الكرة الارضية, ولا الكرة الارضية مركز الكون, بالتالي متتعبش نفسك وتفكر بشكل متعب لذاتك لان الموضوع ببساطة لاشئ....

بس النقطة الاكبر اللي بفكر فيها, ان لو فعلا زي ادامز ماقال, ان الارض حاسوب عملاق تم اختراعه عشان يجاوب عن الاسئلة الوجودية لكائنات اكثر ذكاء وتطورا مننا,فأكيد الأرض عندها وجود ما , وانها مش مجرد مادة طافية في فضاء الكون, بالتالي سؤال لعزيزتي الارض:إنت ليه ما انتحرتيش من زمان ؟.
"طبعا الفرضية السابقة مبنيه على فرضية للعزيز ادامز, واللي هي فرضية ممكن تكون مقنعه اكثر من اي فرضيات ميتافيزيقية اخرى, وللإستزادة, راجعوا كتاب دليل المسافر المتشعلق للابحار في المجرة".

عزيزي ادامز:
اغفر لي عدم قراءتي المنتظمة لكتابك , وانقطاعي الغير المبرر عن الاستزادة الدائمه من بركاتك, واعدك بالرجوع اليك, عندما تسنح الفرصة, علما, بإني اود ان اهدي الى روحك اغنيتك المفضلة, التي لا اتذكر اسمها.

من الحاجات اللي ضايقتني اني لقيت هومر شمشمون عامل اعلانات هو وعياله , عشان منتجات لشركات زي نستله الخ, بجد اتضايقت اوي, وحسيت ان نفسي صوعبت علي اوي, واني مخدوع ان الحاج عمر طلع برا السياق الايدولوجي والفكري بتاعي, واصبح يسوق لمنتجات العصر الرأسمالي المتوحش, حرفع بعد كدا يافطة" ضد عمر سيمبسون, عميل الرأسمالية" , وطبعا مش حنسى اني اتفرج عليه في السر.

سؤال
ايه الافضل لك, انك تكون انت والقرود من اصل واحد-مشترك, ولا انت وزغلول النجار من اصل واحد-مشترك ؟

كمالة سؤال
هو ايه الفرق بين حمائي وذكوري؟ وفي حالة تخلينا عن ذكوريتنا وقت محاولة لفرض سلطة ذكورية, هل دا حيخلينا اكثر ضعفا, ولا اكثر حكمة, ولا اكثر هبلا ؟