ساقية
لما بقرأ بودي, بعرف انا فين بالظبط, بعد كام تدوينة عبثية لي كتب بودي تدوينة عبثية لطيفه,وملهمه لحد ما للحالة اللي انا فيها ....
يالا بينا نسرق بنك, وتنجح الخطة, وبعديها نصاب بنوبة جنون, ونحرق كل الفلوس اللي سرقناها, ونفضل نسكر بقية حياتنا ونقول احنا كنا لمدة ثواني مليونيرات...
يالا بينا ننهي وجودنا, وقبل ما نموت بثوان, نكلم الاسعاف, تلحقنا, بس نحيا حياة النبات, وجسمنا كله يموت, ونفضل نفكر داخل عقولنا اد ايه كنا في يوم من الايام احياء, بس دالوقت, مش عارفين حتى اننا نرجع, او نروح للموت.
انك تكتب فكرة عبثية,تغرق في تفاصيلها,تستدعي من ذاكرتك كل اوهامك, ضلالاتك, وتبني عليهم مشهد لطيف ممكن تغرق فيه لمدة ساعات.
لما كل حاجه حواليك بتتكرر ....
قرد الرملة, كتب تدوينة بيقارن فيها بين المشهد قبل الانتخابات السنة دي والمشهد السابق في 2004-2006.
حقيقي من التدوينات اللي احترمتها لما قريتها له, بغض النظر عن رأيي في القرد, بس تدوينه لها معنى, وبتثبت درجة عبث كل حاجه حوالينا.
احنا مربوطين في ساقية, وذاكرتنا بالظبط هي ذاكرة الدوران حول الساقية, بمجرد مانوصل لنقطة البداية, اللي هي نقطة النهاية, نفقد الزمن اللي فات بذاكرته ونبدأ زمن جديد...
مين قال ان السمك بس, اللي ذاكرته قصيرة ؟
بيقولك الانسان بيعيش ويتعلم, ويتعلم من اخطاءه, دي اكثر مقولة بضحك منها, مين فينا اصلا بيتعلم من اخطاءه؟
اه مابنكررش نفس الاخطاء ساعات, بس بتحور الخطأ, بتغيير الموقف, وتغيره, بيتعمل خطأ جديد, شبيه لدرجة مرعبه بالأخطاء السابقة لما تفكر فيه.
حد قال اننا اجهزة حاسوب, بندخل فيها بيانات معينه, محددة, وبالتالي, عمرها ما حتخطأ نفس الخطأ السابق, عشان البيانات اللي دخلتها, عمرها ما حتلتوي ؟
احنا كلنا مصابين بنوع لطيف من الجذام, مش الجذام اللي بيوقع جلدك, الجذام اللي بيوقع حتت من روحك, طول ما انت ماشي, وبيستهلكها, وبيمضغها, وبيتفها, فضلات...
بتوقع حتة من روحك, في الشغل, في البيت, في الشارع, في السياسة, في البيت, في الحب, الحزن, الفرح, الضحك, البكاء.
طول ما انت ماشي بتوقع حتت منك, وبتتلفظ, ولما تيجي تجمع البقايا , مش حتلاقيها, ولو لقتها, مش حينفع انك تعيد تجميعها, لأنها وبطريقة مضحكه جدا, بقت وساخه.
كلنا بنتوسخ, كلنا بنلقط ذرات خرا, طول ما احنا ماشيين في الحياة, وبنجري على الطريق, ليه ؟
عشان نوصل للنهاية ونموت ....
يبقى احنا بنتوسخ عشان نموت ؟
مش ممكن نكون بنموت عشان ننضف ؟
ماهو لو واحنا عايشين بنتوسخ, ولما بنموت بيتم غسلنا وتنضيفنا وكيينا بالبخار, وبنرجع نتولد تاني, ونتوسخ تاني, ففين الفكرة ؟
حتى الموت والحياة, مجرد ساقية تانيه.
بذمتك دا مش عبث, وعبث على درجة عاليه جدا؟
عبث كوني يا محترم, حتى الكون, عابث.
بالتالي, لما حد يتكلم كلام كبير اوي, ويقولك الهدف من الوجود, والهدف من الحياة, واحنا لازم نحقق, ولازم نتحرك, ولازم نغير, ولازم نعمل مجتمع العدل على الارض.
اسئله سؤال واحد
وانت وانا حيجرى لنا ايه واحنا بنحاول المحاولات دي ؟
حنفقد اد ايه ؟ وحنضيع ايه؟
وفي النهاية حنكون ايه ؟
غير ثور مربوط في ساقية معدومة الذاكرة ؟
- قرأت 1211 مرة
التعليقات
klamk sa7 ldrja mor3ba 3an
klamk sa7 ldrja mor3ba 3an jd kter mzbot
علِّق