MaLek X

في العام 1969 قامت حرب بين الهندوراس والسلفادور, وكان السبب الواضح مبارة كرة قدم في التصفيات المؤهله لعام 1970.
جذور المشكلة كانت بترجع لأول القرن, بسبب نقص موارد في السلفادور, اللي عدد سكانها ضعف هندوراس, ومساحتها نصهافحصل هجرة ضخمه من السلفادور لهندوراس, وصلت لكون 20 في المئه من المزارعين في هندوراس من السلفادور...
وبالطبع, زي جزئ كبير من دول امريكا اللاتينيه في الوقت دا, كان المتحكم في الزراعه, والارض, هي شركات ضخمه, واهمه شركة الفواكة المتحده.
اللي حصل, ان شركة الفواكه المتحدة, عملت حلف بينها وبين عدد من كبار الملاك, والشركات, كان موجه بشكل واضح, ضد الفلاحين, واصحاب الملكيات الصغيره, وعلى رأسهم المهاجرين من السلفادور.
بالتالي استجاب الرئيس الهندوراسي لضغوط الحلف, وطلع قرار, بتأميم اراض السلفادورين, واعادة تهجيرهم مره تانيه لبلدهم...
ممكن تكمل قراءة على الرابط التالي لويكي بيديا
http://en.wikipedia.org/wiki/Football_War

بعد الحرب العالمية الأولى, وهزيمة دول المحور, تنامى شعور بالعجز والاحتياج لأي شكل من اشكال الانتماء, ترادف دا مع الهزيمة اللي منيت بها ألمانيا, وايطاليا, وتركيا, وكانت النتيجة الطبيعيه, هو مجموعة من المتعصبين "الشوفينين او الفاشيين"
اتاتورك في تركيا
موسوليني ايطاليا
هتلر ألمانيا
.........
ايه الفرق بين هزيمة حرب واضحه ومباشره, بتأدي لكسر انسانية الانسان, وبتحوله, لمجرد مسخ, وبقره بتتحلب ليل نهار؟

مش الاثنين برضه بيتسموا هزيمه, بس واحده واضحه ومباشره, والتانيه من تحت لتحت في الخباثة....

احنا داخلين على ايه ؟

بقالي كام يوم بسمع هتافات في الشارع, ومصر, وتحيا مصر, ونموت لموت بلابلابلابلا....
هو مش نفس الشباب كانوا بيموتوا بسبب مصر؟
...........................

مبارة مصر والجزائر حقيقي مش فارقه معايا, انا علاقتي بالكوره, اني بكره النادي الاهلي, وبنبسط اوي لما بيخسر, ومنتخب الكوره, لما بيكسب بنبسط ان في ناس بتفرح, ولما بيخسر, بضايق عشان في ناس دمها حيتحرق, انما بالنسبة انا مش بيفرق معايا الموضوع, لو ماتش كرة يد, كان ممكن اتحمس, واتفرج واعمل فرح, انما قدم, ماليش فيها حقيقي...

بالتالي, مش بحكم على اي مشجع كوره, ولا بقول انهم متخلفين وهمج بلابلا, وحقيقي مش فارق معايا, في ناس بتحب البسله, وانا بكرهها عمى, هل لازم اكره اللي بيحبوا البسله ؟

حضرات مشجعي الكوره في كل مكان, حقيقي, انا ماليش دعوه بكم, والتدوينة دي مش للتنطيط على حضراتكم, وذواتكم العاليه, اللي حسستوني, ان في في قلة منحرفه بتعمل لمصلحة الوطن, هدفها, ابادتكم...

ارجع للموضوع:
بعض ممن يحملوا الجنسية المصرية لهم استثمارات ضخمه في الجزائر, وكما نعلم الجزائر بلد نظامه فاسد كما مصر بالتمام.
بعض ممن يحملوا الجنسية الجزائرية, حبوا ياخدوا اللقمة من بوق المصريين.
الاثنين سخنوا على بعض, عشان مصالح حقيقي الشعبين مالهمش دخل فيها, بس في النهاية, الموضوع قلب على الكل...
.......
شوية تعريفات محتاج افهمها.....
يعني ايه خراوية عربية؟
احنا بقالنا كام سنة عرب اصلا؟, احنا ولا الجزائر ولا المغرب كله, ولا الشام وفلسطين ؟
ويعني ايه قومية بمعناها السياسي الايدولجي, مش بالمعنى الإثني؟
ويعني ايه شقيقة كبرى, وصغرى, واللي قاعده في النصف ؟
يعني ايه امه اسلاميه واحده ؟
يعني ايه تقسيم بشر وجعلهم وحده بسبب دين, ممكن كل بني ادم جواه يفسره كل كلمة على مزاج اهله ؟
"قولي يا كابتن, هو الغلمان اللي في الجنه,حلال النوم معاهم ولا حرام؟"
السؤال السابق سفسطه, مافيش داعي للاجابه عنها حقيقي, انا بس سايبه لمجرد التدليل على حاجه في دماغي, ليس الا...
ويعني ايه بقى, والاهم قوميه مصرية ؟
هو يعني ايه زفت الطين مصري اصلا؟
احنا شعوب هجينه بشكل ابن كلب, زي بالظبط كلاب الشوارع لا مؤاخذه, كله ناطط على كله, يعني مافيش عرق واحد واضح للشعب دا, بالاختلاف عن الايرانيين والافغان مثلا, بالتالي انت بتعرف جنسيتك, على اساس ابوك وامك وشهادة ميلادك ؟
ماشعوب حوض البحر المتوسط, والشرق الاوسط, كلهم لاعبين في بعض, من الاف السنين...
بالتالي لو سئلتك انت مصري حتقولي ايه ؟
....................................

وطنية وقومية اسلاميه, باذنجانيه
انا كل اللي عاوزه في اخر النهاردة, ان الناس اللي تهمني دمها مايتحرقش,, وان صاحبتي متتبهدلش في الشارع, وان مقعدش في دوشه ليل نهار, ومظاهرات عشان ماتش كوره ومقالات, وقلة ادب في كل حته, عشان مصالح كام كلب هنا وهناك...
وفي النهاية, احب اهديكم اغنية الفنان الكبير, المطرب العظيم, حسن كامي
"انا وطني وطني وبطنطن"
وبعدها اغنية السيد شعبان عبدالرحيم, المعنونه بها التدوينة.