ليه حنصوم جماعيا ضد العسكر

في الحروب, بتكون داخل المعركة وانت مستغني عن جسدك, عن نفسك, عن صحتك مقابل حريتك, مقابل الشئ اللي انت مؤمن به, مقابل حبك لرفاقك,اسرتك, وطنك.

في الحروب, مابتخافش من الرصاص, مابتخافش لما زميلك يموت جنبك, مابتتراجعش لما النار بتكون من كل اتجاه, ولا مفر امامك غير انك ترمي بنفسك في النار, وياتغلبها يا تموتك.

دالوقت احنا في حالة اسوء من الحروب, لان في الحروب بيكون اللي قصادك عدو اغتصب ارضك,وطنك,املك, حريتك, وبيكون من جنس تاني غير جنسك.

دالوقت المغتصب من نفسك جنسيتك, وغالبا من نفسك معتقدك الديني, والاكادة انه بيكون نفس لونك, طولك.

واللي يحرق لك دمك, انه بيستخدم اخوك اللي من لحمك, او صاحبك في الشارع او الحارة, او المدرسة عشان ينزل ع دماغك بكعب البندقية, او رصاصها.

حتى وانت بتحاربه, وبترمي طوبه ضده, بتبقى عندك حته خايفه, لا يكون حد من اللي حياخد الطوبة, مجند بيقضي خدمته, وحيروح, ولو مكنتش تعرفه, فاكيد حد غيرك في نفس صفك يعرفه, واكل معاه في يوم من الايام, عيش وملح, وضرب معاه سيجارة, وممكن قزازتين بيرة, او حتى صلى معاه الفجر قبل امتحان الثانوية العامة-الصنائع.

ممكن نقسى, ونقول من قتل يقتل, بس في النهاية انت مش عارف المجند اللي قتل رفيقك-زميلك-اخوك, كان فاهم ايه؟
او محفظينه ايه؟
او هو اصلا كان عارف هو بيعمل ايه او لا....

عيش وملح, اكتر حاجه ممكن تربط بين اتنين, والقسم الدائم بيننا بيكون يا حلفان بالعيش والملح, يا حلفان بالنعمه اللي هي برضه الاكل.

طب بما انه خان العيش والملح, وخان النعمه, فاحنا قررنا اننا نصوم عن العيش والملح, مش عشان هو يفوق, او يوقف, او يتراجع عن اللي بيعمله.

بس عشان زي اي حد من البلد دي ما بيعمل, بيقول للناس كلها, ويشهد الناس ع خيانته, ويشهدهم ع فجره, وتجبره, وقد ايه السواد بقى بدل الاحمر لون الدم جواه.

احنا قررنا الصيام, مش استجداء لحد, ولا طلب شفقة او عطف من حد, بس صايمين لرفضنا النعمه المغموسة بالقهر والذل.

الاكل مالهوش معنى, وماسخ لو كان اوله ذل, واخره هوان, واثناءه جبن, وتلفت يمين وشمال في انتظار الصفعه-اللطمة اللي حتنزل ع كرامتك, وحتسرق البقية الباقية من حريتك.

ستنا مريم وسيدنا زكريا صاموا...
سيدنا النبي كان لما تلم به مصيبه كان بيصوم, ويعلن الصيام الدائم.
كل الاولياء والانبياء اعلنوا رفضهم التام للطعام المطبوخ بالعبودية, والمطعم بكسرة المناخير ومطاطية الرأس.

ماتسئلنيش ان كان دا ضعف ولا لا, وماتسئلنيش ان كان دا صح او لا, انا معنديش اجابة, غير رفضي ان يدخل جوفي ذل اكتر من كدا, ورفضي ان استمر في نعمة الهوان اكتر من اكتر كدا .

احنا صيامنا الجماعي حيبدأ يوم الجمعه 18 نوفمبر في نقابة الصحفيين, حيسبقة مؤتمر صحفي يوم الاربعاء الساعة السادسة مساءحتتكلم فيه الدكتور ليلى سويف, يليه جلسة تحضيرية لاعتصام, حيتكلم فيها طبيب لاعطاء الارشادات الصحية والطبية,محامي لتقديم المشورة القانونية والبدأ في تقديم البلاغات, وانا لنقل خبرة صيامات سابقة عن الطعام

خلال الصيام, مش لازم الكل يبات في نقابة الصحفيين, بس حنتفق ع ميعاد الكل يتجمع فيه في النقابة, للمتابعة الطبية, والقانونية, والاعلامية, لمدة ساعتين لأربعة يوميا.

طبعا لو تقدر تشارك وتبات طول الوقت معانا في النقابة, فحيكون لطيف جدا, لو مش حتقدر فكفاية زيارة يومية, لمتابعة حالتك...

التعليقات

خيارات عرض التعليق

اختر الطريقة التي تفضلها لعرض التعليقات، ثم اضغط على "احفظ الإعدادات" لتفعل التغيرات.

صايمين لرفضنا النعمه المغموسة

صايمين لرفضنا النعمه المغموسة بالقهر والذل

كل الاولياء والانبياء اعلنوا رفضهم التام للطعام المطبوخ بالعبودية

عرض الفكرة و لا اروع
ربنا يبارك فيك

انت انسان نضيف

الناشط الطاهر

احلا تلخيص
انت انسان نضيف
و بتنشر نضافة النفس وكرامتها
ربنا يسمعنا عنك كل خير
و اللى أصابو عينك ما يفرقوش كتير عن اللى قطعوا صوابع و لا حنجرة مناهضى الحكم فى سوريا
كلها فضلات انظمة هتقع بيك
و باللى زيك
هما ما يعرفوش هو مين مالك
هما اتربوا على الذل و اللى اتربى على غير كده يبقى بيقول كلام غريب عليهم
ما يعرفوش غير انك عدو

مايعرفوش انك أطهر صديق لهم و لبلدك و لاولادهم

معلش بكرة يعرفوا

علِّق

محتويات هذا الحقل سرية ولن تظهر للآخرين.