ليه إضراب جماعي عن الطعام ؟

احنا حنضرب للتضامن مع مواطنين تعرضوا للظلم والقهر واتعذبوا واتسحلوا في السجون العسكرية, الغير مفترض اصلا انهم يكونوا جواها.
الإضراب الحماعي عن الطعام مش محاولة انتحار, هي وسيلة ضغط سلمية جماعية لم تجرب بشكل جماعي من افراد من قبل في مصر "حسب علمنا" خارج السجن.
انت مش بتهلك صحتك ونفسك اللي حتتحاسب عليها, اد ما انت بتجاهد حاكم ظالم, ظلم اخوان لك في الوطن, وبهدلهم, هم واهاليهم وخلاهم يقضوا عيد ورا عيد بعيد عن امهات وابناء وزوجات لهم.
انت مش بتعمل عمل مجنون, او مغامر او بتلقي بنفسك في التهلكة, انت بتطبق ابسط مبادئ الاديان, والاخلاق, والحرية, انت بتحارب نظام متجبر بيظلم ويسجن اخوانك.
احنا قررنا الإضراب, مش استجداء لحد, ولا طلب شفقة او عطف من حد, بس مضربين عن الطعام لرفضنا القهر والذل.
الاكل مالهوش معنى, وماسخ لو كان اوله ذل, واخره هوان, واثناءه جبن, وتلفت يمين وشمال في انتظار الصفعه-اللطمة اللي حتنزل ع كرامتك, وحتسرق البقية الباقية من حريتك.
.
انت مش بتعمل اضراب مفتوح لا نهائي من اجل اللاشئ, انت بتطلب بكل بساطة, جدول زمني لتحويل المحكوم عليهم عسكريا من المدنيين, لمحاكم مدنية, ويعرضوا امام قضاء مدني هو اللي يقرر مصيره
النهاردة في مركز هشام مبارك للقانون, جلسة تحضيرية في السادسة مساء, للتحضير الطبي,القانون للاضراب.
واحد ش سوق التوفيقية الاسعاف رمسيس,الدور الخامس

التعليقات

خيارات عرض التعليق

اختر الطريقة التي تفضلها لعرض التعليقات، ثم اضغط على "احفظ الإعدادات" لتفعل التغيرات.

مش هيضغط على السلطة و تأثيره سلبي على المضربين

بس يا مالك الإضراب عن الطعام مش هايسبب أي ضغط على السلطة الموجودة, و لا يحرجها لأنها أصلاً مش مهتمة بصورة ولا شرعية
العكس ضرره مش هايكون غير على المضربين نفسهم بس, و بلا طائل للأسف
الأمثلة موجودة و متكررة, من وفاة عامل بوليفار و عامل النقل العام اللي كانوا مضربين عن الطعام, لتدهور صحة مايكل نبيل, منغير ما أهدافهم تتحقق
و فيه أمثلة زي الإضرابات عن الطعام اللي اتعملت خلال اعتصام يوليو و اتفكت منغير أي نتايج, دول في رأيي أضروا بالقضية باستهلاك الأداة دي بشكل غير ناضج
أتمنى إننا ماننجرفش للمسار ده غير لو عارفين مدى قوتنا و انتشارنا, و مستعدين بخطوة تصعيد تانية بعد مدة معينة من عدم الاستجابة

علِّق

محتويات هذا الحقل سرية ولن تظهر للآخرين.