عن الاضراب عن الطعام,ترتيبات قبل واثنا

حنبدأ اضرابنا عن الطعام يوم الاحد السادسة مساء نقابة الصحفيين.

الاستعدادات الواجب اتخاذها قبل الاضراب عن الطعام.
أ
قبل الاضراب.
1-الامتناع عن اكل اي مأكولات لمدة 24 ساعة قبل موعد الاضراب, والاكتفاء بأكل الفاكهة والاكثار من تناول المياه,والعصائر.
2-ارسال ايميل بإسمك الرباعي مصحوبا بالرقم القومي ع الايميل التالي
hsnomiltrials@gmail.com
لتضمين اسمك في البلاغ المقدم للنائب العام.
ودي صفحة الاضراب ع الفايس بوك
https://www.facebook.com/hungerstrikenomiltrials
3-ركز قبل الاضراب بفترة في تناول اقراص تحتوي مجموعة فيتامينات متعددة"حديد-ماغنسيوم الخ"

4-ماتحاولش تبذل اي مجهود كبير في التلات ايام السابقة للاضراب للحفاظ ع الطاقة بقد الامكان,وعدم حرق سعرات حرارية انت في امس الحاجه لها.

5-ابدأ عود نفسك ع فكرة الاضراب, بالتقليل التدريجي للطعام, ماتحرمش نفسك, بس قلل الكمية ع قد ما تقدر"قلل الكمية لا يقصد بها انك تطول الوقت بين الوجبة والاخرى, لان دا بيخليك تاكل اكتر".

6-ممنوع عليك تماما الاضراب ان كنت مصاب بالامراض التاليه
"سكر,ضغط دم مرتفع,قلب,التهاب كبد وبائي,فشل كلوي,اي مرض من امراض المناعة أو الغده"
الاضراب عن الطعام شكل من اشكال الاحتجاج, مش انتحار, وغير مرحب بمحبي الانتحار....

7-لو مريض بنزلة برد,او انفلونزا, او غيرهم من امراض الشتاء اخر دخولك الاضراب لحين تماثلك للشفاء, لكي لا تنتكس حالتك.

ب-بداية الاضراب

1-الاضراب عن الطعام مش مؤلم غير في اول يومين, لو عرفت تنتصر ع نفسك في اول يومين, وتصمد امام الجوع, حتعرف تعدي الاضراب وانت مرتاح جدا, الصعوبة كلها في اول 48 ساعة, عشان كدا انا كشخص بقضيهم نوم :-)

2-لابد من مضاعفة كمية المياة اللي بتشربها, لانك بتمنتع عن الطعام اللي كان بيدخل كمية سوائل بتعوض نقص المياه, فـ في حالة عدم وجود الاكل, لابد من مضاعفة كمية الماء.

3-حنحصر ع توافر كميات كافية من محلول معالجة الجفاف' لتعويض الاملاح اللي بيفقدها جسمك, واللي نتيجة امتناعك عن الاكل, مابقتش تتعوض.

4- ينفع تشرب شاي وسجائر, بس لازم تقلل الاتنين ع قد ما تقدر عشان تقدر تواصل, 5 سجائر لـ10 سجائر في اليوم هو الرقم المقبول, اكتر من كدا خطر, وكوبين شاي احمر كفاية في اليوم.
5-يمكن تعويض شربك للشاي بمشروبات اخرى, زي اليانسون,نعناع,شاي اخضر.
6-القهوة والكحول ممنوعين تماما.
7-حيكون في عصير ليمون مضاف اليه سكر"ليموناده" بس ممنوع اي عصائر او ألبان اخرى.
8-حيكون في كشف طبي يومي ع السكر والضغط والقلب, للتأكد من سلامة حالة المضرب.
9-مهم جدا تكون عامل حسابك في هدوم تقيلة"اتقل من اللي بتلبسه في العادي" عشان التدفئة الجسدية, اللي حتكون اقل نتيجة امتناعك عن الطعام

ج- التضامن
لحد الان في حزب واحد فقط وهو المصري الديمقراطي قرر انه يتضامن معانا, باضراب عدد منهم لمدد معينة, في سبيل القضية, نتمنى من الافراد اللي حيكون صعب عليهم الاضراب لظروف صحيه او مجتمعية, انهم يضربوا معانا تضامني ليوم او يومين.
2-حاول تتكلم عن الموضوع في كل حتة, في شغلك, في الشارع, مع البواب, مع السايس, سواق التاكس,زمائلك في العمل-جامعة-نادي-كنيسة-مسجد, واحكي لهم عن الاضراب, وهدفه, استعن بالتدوينات المكتوبة قبل كدا, وحاول تعرفهم اللي بيحصل, الموضوع مش حياخد منك اكثر من دقيقة, ماتبخلش بها علينا.
3-خليكم معانا :-)

التعليقات

خيارات عرض التعليق

اختر الطريقة التي تفضلها لعرض التعليقات، ثم اضغط على "احفظ الإعدادات" لتفعل التغيرات.

للنشطاء فالتحرير اللى بيعتوا

للنشطاء فالتحرير اللى بيعتوا وبيتابعوا الاخبار على تويتر ااقفلوا اللوكيشن يا جماعه أقفلواااااااااااااااااااا اللوكيشن
بيظهر مكان وبيتم تحديده بناء على اللوكيشن اللى موجود فالتويته فانتبهوا

مالك مش عارفه اتابع معاكم كما

مالك مش عارفه اتابع معاكم كما ينبغى بس اكيد انا معاكم ربناء يشفيك ويقومك بالسلامه من اكبر الصدمات اللى حصلتلى اشوفك مصاب عل الشاشه فى اول لحظات ويقولوا احد المتظاهرين
الناس اللى خايفه تنزل ولسه معندهاش دم ولا نخوه او حتى معترضين على اللى بيحصل فالتحرير للناس اللى لسه عايشه الوهم ومصدقه على الاقل تضامنوا معانا فدعوة العصيان المدنى فكل البيوت

علِّق

محتويات هذا الحقل سرية ولن تظهر للآخرين.